Pharmed
TERAPIN 200/28MG 70ML SUSP
TERAPİN BİD
Beynalxalq patentləşdirilməmiş adi: Amoxicillin and Clavulanic acid
TERAPİN BİD Tərkibi
Təsiredici maddələr: 5 ml suspenziyanın tərkibində 200 mq amoksisillin (amoksisillin trihidrat şəklində) və 28,5 mq klavulan turşusu (kalium duzu şəklində) vardır. Köməkçi maddələr : susuz limon turşusu, natrium sitrat dihidrat, mikrokristallik sellüloza, ksantan kitrəsi, kolloidal silisium dioksid, silisium dioksid, şəkər tozu, natrium benzoat, moruq essensiyası.
ATC kodu: J01CR02.
Farmakoloji xüsüsiyyətləri
Farmakodinamikası: Geniş təsir spektrli antibiotikdir, tərkibində yarımsintetik penisillin qrupuna aid olan amoksisillin və beta-laktamaza inhibitoru - klavulan turşusu vardır. Klavulan turşusu əksər beta-laktamazaları inaktivləşdirir. Klavulan turşusu amoksisillindən fərqli olaraq fermentlə stabil qeyri-aktiv kompleks əmələ gətirərək, amoksisillini beta-laktamazanın fermentativ deqradasiyaedici təsirindən qoruyur. Terapin BID qrammüsbət və qrammənfi bakteriyaların geniş spektrinə (hətta beta-laktam antibiotiklərə qarşı rezistent olan ştammlara) bakterisid təsir göstərir.
Farmakokinetikası: Daxilə qəbuldan sonra dərman vasitəsinin hər iki komponenti MBT-dən tez və tam şəkildə sorulur. Qida ilə birlikdə qəbulu dərman vasitəsinin mənimsənilməsinə təsir göstərmir. Qanda maksimal konsentrasiyası 45 dəqiqə ərzində yaranır. Təsiredici maddələrin yuksək konsentrasiyaları plazmada, bəlğəmdə, bronxial mayedə, plevral mayedə, ağciyər toxumasında, prostat vəzində və piy toxumasında aşkar edilir. Amoksisillinin yarımçıxarılma dovrü (T1/2) 88 dəqiqəyə, klavulan turşusunun isə 60 dəqiqəyə bərabərdir. Amoksisillinin 60-80%-i, klavulan turşusunun isə 25-40%-i orqanizmdən dəyişmədən böyrək yolu ilə xaric olunur.
İstifadəsinə göstərişlər
Təsiredici maddəyə həssas bakteriyalar tərəfindən törədilmiş infeksion iltihabi xəstəliklərin müalicəsi:
▪ Yuxarı tənəffus yollarının infeksiyaları (o cümlədən, orta otit, sinusitlər);
▪ Aşağı tənəffüs yollarının infeksiyaları (o cümlədən, xronik bronxitin kəskinləşməsi və pnevmoniya);
▪ Sidik yollarının infeksiyaları;
▪ Dərinin və yumşaq toxumaların infeksiyaları.
Əks göstərişlər
Penisillin qrupu antibiotiklərinə qarşı yüksək həssaslıq. Terapin BİD -nin əvvəlki qəbulu zamanı xolestatik sarılıq/qaraciyər disfunksiyasının baş verməsi.
Xüsusi göstərişlər ehtiyat tədbirləri
Dərman vasitəsi allergiyaya meylli olanlarda və sefalosporin qrupu antibiotiklərinə qarşı allergiyası olanlara ehtiyatla təyin olunur.
Digər dərman vasitələri ilə qarşılıqlı təsiri
Klavulan turşusu amoksisillinin absorbsiyasina təsir etmir. Dərman dolayı təsirli antikoaqulyantların təsirini onlarla birlikdə istifadə edildikdə gücləndirə bilər. Disulfiram, allopurinol, metotreksat ilə birlikdə istifadə edildikdə onların əlavə təsirlərinin təzahür riskini artırır. Aminoqlikozid antibiotiklərin in vitro şəraitdə aktivliyinin itməsinə səbəb olur.
Hamiləlik və laktasiya dovründə istifadəsi
Dərmanın hamiləlik və laktasiya dovründə istifadəsinin təhlukəsizliyi öyrənilməmişdir.
TERAPİN BİD İstifadə qaydası və dozası
Müalicə zamanı doza uşağın bədən kutləsindən asılı olaraq müəyyən edilir. Kütlədən asılı olaraq dozaya düzəliş edilməlidir. Yüngül və orta ağırlıqlı infeksiyalarda 25/3,6 mq/kq/gün iki bərabər dozaya bölünərək, 12 saatlıq fasilə ilə istifadə olunur Ağır infeksiyalarda 45/6,4 mq/kq/gün iki bərabər dozaya bölünərək, 12 saatdan bir istifadə olunur
▪ 2 aylıq-2 yaşlı uşaqlar: 12 saatlıq fasilələr ilə 1/2 ölçü qaşığı (2,5ml)
▪ 2 yaşlı-6 yaşlı uşaqlar: 12 saatlıq fasilələr ilə 1 ölçü qaşığı (5ml) Müalicə kursu 14 gündən çox olmamalıdır. Terapin BID 200 mq/28 mq suspenziya 2 aylıqdan aşağı uşaqlara tövsiyə olunmur. Böyrək funksiyasının aşkar pozulmasında (KK < 30 ml/dəq) dozaya düzəliş edilməlidir – bu, bir qəbuldakı dozanın azaldılması və ya dərmanın qəbul vaxtları arasındakı fasilənin 12 və ya 18 saata qədər uzadılması yolu ilə edilə bilər.
Əlavə təsirləri
Əlavə təsirlər orqan sistemləri üzrə göstərilir və tezliyinə görə təsnif edilir: çox tez-tez (≥1/10); tez-tez (≥1/100, <1/10); bəzən (≥1/1 000, <1/100); nadir (≥1/10 000, <1/1000); çox nadir (<1/10 000); məlum deyil (mövcud məlumatlara əsasən qiymətləndirmək mümkün deyil).
İnfeksiya və invaziyalar: tez-tez – dəri və selikli qişaların kandidozu; məlum deyil – qeyri-həssas mikroorqanizmlərin artması;
Qan və limfa sisteminə: nadir – geriyədönən leykopeniya (neytropeniya daxil olmaqla) və trombositopeniya; çox nadir – geriyədönən aqranulositoz və hemolitik anemiya; məlum deyil – trombositopenik purpura; eozinofiliya; İmmun sisteminə: çox nadir – angioödem, anafilaksiya, zərdab xəstəliyinə bənzər reaksiyalar, hiperhəssaslıq vaskuliti;
Sinir sisteminə: bəzən – baş ağrısı və başgicəllənmə; nadir – narahatlıq, həyəcan, davranış pozulmaları, huşun dolaşıqlığı, qıcolmalar, yuxusuzluq; çox nadir – geriyədönən hiperaktivlik və qıcolmalar;
Mədə-bağırsaq sisteminə: tez-tez – diareya, ürəkbulanma, qusma; bəzən – həzmin pozulması (dispepsiya); çox nadir – hemorragik/psevdomembranoz kolit (psevdomembranoz kolit simptomları müalicə dövründə və ya ondan sonra yarana bilər), qara “tüklü” dil;
Qaraciyər və öd sisteminə: bəzən – qaraciyər fermentlərinin (AST, ALT) səviyyəsinin mülayim yüksəlməsi; çox nadir – hepatit və xolestatik sarılıq;
Dəriyə və dərialtı toxumalara: bəzən – səpgi, qaşınma, övrə; nadir – çoxformalı eritema; çox nadir – Stivens-Conson sindromu , toksik epidermal nekroliz, eksfoliativ dermatit, generalizəolunmuş kəskin ekzantemoz pustulyoz; Sidik sisteminə: nadir – hematuriya; çox nadir – interstisial nefrit, kristaluriya.
Doza həddinin aşılması
Toksik təsiri zəif olduğu üçün doza həddinin aşılmasının ehtimalı aşağıdır. Əlamətləri: ürəkbulanma, qusma, diareya. Müalicəsi: simptomatik. Hemodializ effektlidir. Dializ mayesində 23,5% amoksisillin və 40% klavulan turşusu aşkar edilir.
Buraxılış forması
Terapin BİD 200 mq/28,5 mq suspenziyanın hazırlanması üçün quru toz, 70 ml-lik şüşə flakonlarda. 1 flakon ölçü qaşıği və içlik vərəqə ilə birlikdə karton qutuya qablaşdırılır. Digər buraxılış formaları: Terapin BİD 1000 mq film tablet №10. Terapin BİD 625 mq film tablet №15.
Aptekdən buraxılma şərti
Resept əsasında buraxılır.