Pharmed
TANELEB 5MG N28 TB
TANELEB 5 mq tabletlər TANELEB
Beynəlxalq patentləşdirilməmiş adı: Nebivolol
TANELEB Tərkibi
Təsiredici maddə: 1 tabletin tərkibində 5 mq nebivolola ekvivalent olan 5,45 mq nebivolol hidroxlorid vardır.
Köməkçi maddələri: laktoza monohidrat, krospovidon A tipi, poloksamer 188, povidon K-30, mikrokristallik sellüloza, maqnezium stearat.
Təsviri
5 mq-lıq ağ rəngli, yumru, ikitərəfli qabarıq, bir tərəfində bölmə xətti olan təxminən 9 mm diametrli tabletlərdir.
Farmakoterapevtik qrupu
Kardioselektiv beta-blokator.
ATC kodu: C07AB12.
Farmakoloji xüsusiyyətləri
Taneleb tərkibi Nebivololdan ibarət selektiv β-blokator olub, qan damarlarını genişləndirir (vazodilatator).
İstifadəsinə göstərişlər
Bu preparat yüksək qan təzyiqini (hipertenziya) aşağı salmaq üçün istifadə olunur. Taneleb, həmçinin, yaşı 70 və yuxarı olan xəstələrdə yüngül və orta dərəcəli sabit xroniki ürək çatışmazlığının standart müalicəsinə əlavə qismində istifadə edilir.
Əks göstərişlər
Aşağıdakı hallarda nebivololdan istifadə əks göstərişdir:
• Sizdə Nebivolol və ya Tanelebin digər inqrediyentlərinə qarşı allergiya (həddən çox həssaslıq) varsa;
• Sizin qan təzyiqiniz aşağıdırsa (sistolik, yaxud “yuxarı” qan təzyiqiniz 90 mm. c. st.-dan aşağıdırsa);
• Sizin qollarınız və ayaqlarınızda qan təchizatı zəifdirsə;
• Sizin ürək vurğularınızın tezliyi aşağıdırsa (bu preparatı qəbul etməyə başlamazdan əvvəl ürək vurğularınızın sayı 60 vurğu/dəqiqə sayından azdırsa);
• Sizdə ürəyin keçirici sistemində patologiya aşkar edilibsə (məsələn, sinus düyününün zəifliyi, yaxud atrioventrikulyar blokada) və sizdə fəaliyyət göstərən peysmeker yoxdursa;
• Sizdə əvvəllər kəskin ürək çatışmazlığı və ya kardiogen şok baş veribsə , yaxud hal- hazırda Sizə ürək fəaliyyətini yaxşılaşdırmaq üçün venadaxili infuziya tətbiq olunursa ;
• Sizdə ağır tənəffüs çatışmazlığı və ya xırıltılar varsa;
• Sizdə feoxromositoma adlandırılan böyrəküstü vəzin şişi varsa;
• Sizdə qaraciyər çatışmazlığı, yaxud qaraciyərin funksional pozğunluğu varsa ;
• Sizdə metabolik asidoz varsa (belə ki, şəkərli diabeti olan xəstələrdə qanda şəkərin miqdarı həddən artıq yüksəlmişsə və qanın mühiti turşuluğa tərəf çox dəyişmişsə);
• Siz, həmçinin, tərkibində floktafenin, yaxud sultoprid olan dərman preparatları qəbul edirsinizsə;
18 yaşdan aşağı yaş hədlərində istifadəsi tövsiyə olunmur..
Xüsusi göstərişlər və ehtiyat tədbirləri
Əgər Sizdə aşağıda təsvir olunan hallardan hər hansı biri baş verərsə, o zaman xüsusi tədbirlər görülməlidir:
• Ürək çatışmazlığı (pasiyentin ehtiyacını ödəyəcək qədər qanın ürək tərəfindən təchiz edilməməsi);
• Ürəkdə yüngül (birinci dərəcəli) atrioventrikulyar blokada;
• Koronar arteriyaların spazmı nəticəsində döş qəfəsində ağrılar (Prinsmetal stenokardiya , yaxud variant stenokardiyası);
• Qollarınız və ayaqlarınızda qan təchizatının zəifləməsi, məsələn, yeriyərkən qıcolmaya oxşar ağrıların baş verdiyi Reyno xəstəliyi, yaxud sindromu;
• Uzun sürən tənəffüs problemləri;
• Şəkərli diabet: Taneleb qanda olan şəkərin miqdarına heç bir təsir göstərmir, amma şəkərin miqdarı aşağı olduqda meydana çıxan əlamətləri (məsələn, taxikardiya, ürəkdöyünmə) gizlədə bilər;
• Qalxanabənzər vəzinin hiperfunksiyası. Taneleb bu zaman meydana çıxan tezliyi qeyri- normal artmış ürək vurğularını gizlədə bilər;
• Allergiya, belə ki, allergik reaksiya çox güclü şəkildə meydana çıxa bilər və onun müalicəsi üçün çoxlu sayda dərman preparatları lazım gələ bilər;
• Psoriaz adlanan dəri xəstəliyi zamanı Taneleb dərinin vəziyyətini daha da pisləşdirə bilər;
• Kontakt linzaların taxılması zamanı Taneleb gözyaşı ifrazını zəiflətdiyi üçün, gözlər bir qədər quruya bilər;
Bütün bu hallarda həkiminiz Sizin müalicənizə düzəliş etməli, yaxud Sizi daha tez-tez yoxlamalıdır.
Əgər Sizin əməliyyat olunmağa və anesteziyaya ehtiyacınız varsa, bu preparatı qəbul etməyiniz barəsində cərraha və ya diş həkiminə xəbər verməyiniz vacibdir.
Əgər Sizdə böyrək problemi varsa, bu preparatı ürək çatışmazlığı üçün qəbul etməyin və həkiminizi bu haqda məlumatlandırın.
Bu preparatın tərkibində laktoza vardır və əgər həkiminiz Sizdə bəzi şəkərlərə qarşı dözümsüzlük olduğunu deyibsə, bu dərmanı qəbul etməməsiniz.
Digər dərman vasitələri ilə qarşılıqlı təsiri
Əgər Siz reseptsiz əldə etdiyiniz hər hansı dərman vasitəsi (OTC), bitki tərkibli dərmanlar, eləcə də güclü təsirə malik vitaminlər və minerallar qəbul edirsinizsə və ya bu yaxınlarda qəbul etmisinizsə, bu haqda həkiminizi və ya əczaçını xəbərdar edin.
Taneleb qəbul edərkən aşağıda yazılan preparatları qəbul etməyiniz barəsində həkiminizi və ya əczaçını məlumatlandırın:
• Diltiazem, yaxud verapamil (yüksək qan təzyiqi və digər ürək problemləri zamanı tətbiq olunur). Taneleblə müalicə zamanı verapamil vena daxilinə yeridilməməlidir .
• Yüksək qan təzyiqinin aşağı salınması üçün istifadə olunan amlodipin, felodipin, lasidipin, nifedipin, nikardipin, nimodipin və nitrendipin kimi kalsium kanallarının blokatorları adlanan preparatlar.
• Antihipertenziv preparatlar, yaxud döş qəfəsində ağrının müalicəsi üçün istifadə olunan üzvi nitratlar.
• Yüksək qan təzyiqinin müalicəsi üçün istifadə olunan klonidin, quanfasin, moksonidin, metildofa, rilmenidin.
• Ürək aritmiyalarında (qeyri-ritmik ürək vurğuları) istifadə olunan xinidin, hidroxinidin, amiodaron, sibenzolin, flekainid, dizopiramid, lidokain, meksiletin, propafenon.
• Trisiklik antidepressantlar (depressiyaya qarşı), fenotiazinlər (psixoza qarşı), barbituratlar (epilepsiyaya qarşı).
• Şəkərli diabet əleyhinə preparatlar (insulun və oral hipoqlikemik preparatlar).
• Diqoksin və ya digər üskükotu qlikozidləri (ürək çatışmazlığının müalicəsi üçün).
• Ağrı və iltihabı aradan qaldırmaq üçün qeyri-steroid iltihab əleyhinə preparatlar (QSİƏP).
• Astma əleyhinə preparatlar, burun tutulması, yaxud qlaukoma (gözdaxili təzyiqin artması) kimi göz patologiyalarında, eləcə də göz bəbəyinin genişləndirilməsi üçün istifadə olunan dərmanlar.
• Anesteziya zamanı: həmişə anestezioloqu Taneleb qəbul etməyiniz haqda məlumatlandırın.
• Simetidini (mədənin artmış turşuluğunun müalicəsi üçün) antasid preparat olaraq qida qəbulları arasında , Tanelebi isə qida qəbulu zamanı qəbul edin.
• Nebivololun metabolizminə təsir edən preparatlar, məsələn, terbinafin (göbələk, yaxud kandida göbələyi infeksiyaları əleyhinə), bupropion (siqareti tərgitmək üçün), xloroxin (malyariya, yaxud revmatoid artrit əleyhinə), levomepromazin (psixozlar üçün), paroksetin, fluoksetin, tioridazin (depressiya əleyhinə).
• Amifostin (kimyəvi və ya şüa müalicəsi zamanı qoruyucu preparat kimi istifadə olunur).
• Baklofen (miorelaksant ).
• Meflokin (malyariya əleyhinə).
Hamiləlik və laktasiya dövründə istifadəsi
Taneleb, ciddi zərurət olmadıqda, əgər həkim tərəfindən təyin olunmayıbsa, hamiləlik zamanı qəbul edilməməlidir. Taneleb qəbulu zamanı ana südü ilə qidalandırma məsləhət görülmür.
Hər hansı bir preparatı qəbul etməzdən əvvəl həkiminizlə, yaxud əczaçı ilə məsləhətləşin.
Nəqliyyat vasitələrini və digər potensial təhlükəli mexanizmləri idarəetmə qabiliyyətinə təsiri
Nəqliyyat vasitələrinin və texnikanın idarə olunması zamanı bu preparatın təsiri tədqiq edilməmişdir. Bu preparat qan təzyiqini aşağı saldığından başgicəllənmə və ya bayılmaya səbəb ola bilər. Belə hal baş verdikdə AVTOMOBİLİ VƏ YA TEXNİKANI İDARƏ ETMƏYİN. Belə hal çox vaxt ilkin doza təyini və ya dozanın artırılması zamanı olur.
TANELEB İstifadə qaydası və dozası
Taneleb 5 mq tabletləri qida qəbulundan əvvəl, sonra və qida qəbulu zamanı, eləcə də qida ilə əlaqəsi olmadan ayrılıqda qəbul edilə bilər. Yarım, yaxud 1 tablet su və ya digər maye ilə qəbul edilməlidir.
Taneleb tabletini həmişə həkiminiz təyin etdiyi kimi qəbul edin. Əgər Siz qəbul edilmə qaydasına əmin deyilsinizsə, onda həkiminizlə, yaxud əczaçı ilə əlaqə saxlayın.
Qan təzyiqinin yüksəlməsi (hipertenziya) zamanı qəbulu:
• Adətən, gündəlik doza 1 tabletdir.
• Yaşlı və böyrək problemi olan xəstələr, adətən, gündəlik ½ tablet qəbulu ilə müalicəyə başlamalıdırlar.
• Preparatın maksimal effekti 4 həftədən sonra əldə olunur .
Xroniki ürək çatışmazlığının müalicəsi zamanı qəbulu:
- Sizin müalicə təcrübəli həkim tərəfindən başlanmalı və nəzarət olunmalıdır. Preparatı son 6 həftə ərzində xroniki ürək çatışmazlığının dekompensasiyası epizodları olmadıqda təyin edirlər.
• Müalicə gündəlik doza olaraq ¼ tabletlə başlamalıdır. 1-2 həftədən sonra gündəlik dozanı ½ tabletə, sonra 1 tabletə, daha sonra isə 2 tabletə qədər artırmaqla Sizin üçün
• uyğun doza seçilməlidir .
• Maksimal gündəlik doza 10 mq (2 tablet) məsləhət görülür.
• Siz müalicə başlanandan və hər dəfə doza artırıldıqdan sonra 2 saat ərzində təcrübəli həkimin nəzarətində olmalısınız .
• Əgər ehtiyac olarsa, həkiminiz dozanı azalda bilər, amma Siz dərmanın qəbulunu birdən dayandırmamalısınız, belə ki, bu, ürək çatışmazlığını ağırlaşdıra bilər.
• Ciddi böyrək problemləri olan xəstələr bu preparatı qəbul etməməlidir. Bu preparatı gündə bir dəfə və yaxşı olar ki, eyni vaxtda qəbul edəsiniz.
Həkiminiz səhhətinizə müvafiq olaraq bu preparatı digər dərmanlarla kombinə etmək qərarı verə bilər.
Tanelebin uşaqlara və yeniyetmələrə təyini məsləhət deyil.
Əgər Taneleb qəbul etməyi yaddan çıxarmışsınızsa:
Əgər bu preparatı qəbul etməyi yaddan çıxarmışsınızsa, lakin qısa müddətdən sonra xatırlamışsınızsa, növbəti dozanı vaxtında qəbul etmək lazımdır. Əgər sonuncu doza qəbulundan uzun zaman müddəti keçərsə (məsələn, bir gün), onda yaddan çıxan dozanı buraxaraq növbəti dozanı səhəri gün həmişəki vaxtında qəbul edin . Unudulan dozanı kompensə etmək üçün ikiqat doza qəbul etməyin. Doza qəbulunun təkrar unudulmamasına çalışın..
Əgər Siz Tanelebin qəbulunu dayandırmışsınızsa:
Həkiminizlə məsləhətləşməmiş Tanelebin qəbulunu dayandırmayın. Əgər bu preparatın qəbulu birdən dayandırılarsa, xəstədə təhlükəli əlamətlər meydana çıxa bilər. Bu, xüsusilə, stenokardiyası olanlarda özünü daha qabarıq şəkildə biruzə verir.
Əgər bu preparatın qəbulu ilə əlaqədar hər hansı bir sualınız olarsa, həkiminizlə və ya əczaçı ilə əlaqə saxlayın.
Əlavə təsirləri
Digər dərman preparatlarında olduğu kimi, Taneleb qəbulu zamanı da əlavə təsirlər meydana çıxa bilər (baxmayaraq ki, hər bir kəsdə bu təsirlər rast gəlinmir).
Qan təzyiqi yüksək olan xəstələrdə tez-tez rast gəlinən əlavə təsirlər (rastgəlmə tezliyi 1/10-dan az, 1/100-dən çoxdur ) aşağıdakılardır:
• Baş ağrısı
• Başgicəllənmə
• Yorğunluq
• Qeyri-adi qaşınma, yaxud keyləşmə hissi
• İshal
• Qəbizlik
• Ürəkbulanma
• Təngnəfəslik
• Əl və ayaqların ödemi
Qan təzyiqi yüksək olan xəstələrdə bəzən rast gəlinən əlavə təsirlər (rastgəlmə tezliyi 1/100-dən az, 1/1000-dən çoxdur) aşağıdakılardır:
• Ürək vurğularının tezliyinin azalması və ya xəstənin ürəklə əlaqədar digər şikayətləri
• Aşağı qan təzyiqi
• Gəzərkən ayaqlarda tutmaşəkilli ağrılar
• Qeyri-normal görmə
• İmpotensiya (ereksiya çətinliyi)
• Depressiya
• Həzmin pozulması, mədə və bağırsaqlarda qaz toplanması
• Qusma
• Dəri qaşınması, eritematoz səpgi
• Nəfəsalmada çətinlik, sıxılma, xırıltılar
• Qorxulu yuxular
• Xroniki ürək çatışmazlığı ilə əlaqədar aparılan klinik tədqiqatlarda rast gəlinən əlavə təsirlər ürək vurğularının azalması, başgicəllənmə, ürək çatışmazlığının ağırlaşması, aşağı qan təzyiqi (tez ayağa qalxarkən bayılma hissi kimi), preparata uyğunlaşa bilməmək, I dərəcəli atrioventrikulyar blokada, qeyri-ritmik ürək vurğusu və ödemlər (şişmiş topuq kimi) kimi təsirlərdən ibarət olmuşdur.
Çox nadir hallarda rast gəlinən əlavə təsirlər (1/10000-dən az ):
• Bayılma
• Angioödemlər: üzün və ətrafların dərisinin, dodaqların, dilin şişməsi; eləcə də boğazın selikli qişası və tənəffüs yollarının ödemi nəticəsində tənəffüsün və ya udqunmanın çətinləşməsi. Belə halda dərhal həkiminizlə əlaqə saxlayın .
• Psoriazın kəskinləşməsi.
Məlum deyil
• Yüksək hiperhəssaslıq, övrə.
Əgər əlavə təsirlərdən hər hansı biri daha ciddi şəkil alarsa, yaxud yuxarıda adı çəkilməyən bir əlavə təsirlə rastlaşsanız, həkimə, yaxud əczaçıya məlumat verin.
Doza həddinin aşılması
Əgər Siz təsadüfən bir neçə tablet (dozadan həddən çox) qəbul etmişsinizsə, o zaman ürək vurğularının ləngiməsi, qan təzyiqinin aşağı düşməsi, yaxud digər ürək problemləri, eləcə də tənəffüsün çətinləşməsi və ya xırıltılar ola bilər. Belə hallarda tez bir zamanda yaxınlıqdakı xəstəxananın təcili yardım bölməsi ilə və ya həkiminizlə, yaxud əczaçı ilə əlaqə saxlayın.
Buraxılış forması
İki bərabər hissəyə bölünə bilən 5 mq Taneleb tableti.
14 tablet, PVX/PE/PVDX/Alüminium folqadan hazırlanmış blisterlərdə. 2 blister (28 tablet), içlik vərəqə ilə birlikdə karton qutuya qablaşdırılır.
Saxlanma şəraiti
30°C-dən yuxarı olmayan temperaturda və uşaqların əli çatmayan yerdə saxlamaq lazımdır.
Yararlılıq müddəti
Yararlılıq müddəti qablaşdırıldığı qutunun üzərində göstərilmişdir. Yararlılıq müddəti bitdikdən sonra istifadə etmək olmaz.
Yararlılıq müddətinin bitmə tarixi qeyd edilən ayın axırıncı günü sayılır.
Görünüşündə hər hansı dəyişiklik müşahidə edilən Taneleb preparatını istifadə etməyin. Bu preparat ev tullantıları ilə və ya çirkab sularına atılmamalıdır. Əczaçıdan bu preparatın hansı formada atılması barədə soruşun. Bu tədbirlər ətraf mühiti qorumağa köməklik edər.
Aptekdən buraxılma şərti
Resept əsasında buraxılır.
İstehsalçı
Specifar S.A. 1,28 Octovriou str., 123 51 Ag. Varvara - Afina, Yunanıstan.
Qeydiyyat vəsiqəsinin sahibi
Welfar Healthcare LTD., UK.
TMS House, Cray Avenue, Orpington BR5 3QB, UK.