Pharmed
NITROMINT 0,4MG 10GR AER
NİTROMİNT
Beynəlxalq patentləşdirilməmiş adı: Nitroglycerin
NİTROMİNT Tərkibi
Təsiredici maddə: 1 q aerozolun (nitroqliserinin 1% spirtli məhlulu) tərkibində 8 mq nitroqliserin vardır. Hər püskürtmə zamanı 0,4 mq (400 mkq) nitroqliserin yeridilir. Köməkçi maddələr:etanol (96%), propilenqlikol.
Farmakoterapevtik qrupu
Ürək xəstəlikləri zamanı istifadə edilən damargenişləndirici vasitələr, üzvi nitratlar.
ATC kodu: C01DA02.
Farmakoloji xüsusiyyətləri
Farmakodinamikası: Təsir mexanizmi Postkapilyar tutumlu damarlar, böyük arteriyalar və xüsusən də koronar damarların preparata cavab vermək qabiliyyətini saxlayan sahələri, rezistiv damarlara nisbətən nitroqliserinə daha həssasdırlar. Sistem qan axının genişlənməsi venoz sistemin tutumunu artırır və bunun nəticəsində ürəyə venoz qayıdış (preyüklənmə), mədəciklərin həcmi və dolma təzyiqi azalır. Bütün bunlar miokardın enerji və oksigenə ehtiyacını azaldır. Dolma təzyiqinin azalması işemiya riski altında olan mədəcik divarının subendokardial təbəqələrinin qan təchizatını yaxşılaşdırır, nəticədə mədəcik divarının regional hərəkətliliyi yaxşılaşır və vurğu həcmi artır. Ürəyin yaxınlığında böyük arteriyaların genişlənməsi boyük və kiçik qan dövranlarının müqavimətini azaldır. Nitroqliserin həmçinin bronxların, sidik yollarının, öd kisəsinin, öd yollarının, qida borusu, nazik və yoğun bağırsaqların saya əzələlərinin hüceyrələrini həmçinin sfinkterləri boşaldır. Ehtimal olunur ki, nitroqliserinin effektləri onun saya əzələlərin hüceyrələrinin membranlarında yerləşən nitrat reseptorları adlanan reseptorlara bağlanaraq, NO yaranmasına və hüceyrədaxili sQMF-nin yığılmasına səbəb olur. sQMF-in yığılması kalsium ionlarının hüceyrəyə daxil olmasının qarşısını alır və saya əzələlərin hüceyrələrinin boşalmasına səbəb olur.
Farmakokinetikası: Sublinqval yeridilmədən sonra nitroqliserin ağız boşluğundan sürətlə sorulur və qaraciyərdən keçmədən sistem dövriyyəyə daxil olur. Biomənimsənilməsi orta hesabla 39% təşkil edir və təkrar istifadəsi zamanı həm fərqli pasiyentlərdə, həm də eyni pasiyentlərdə əhəmiyyətli dəyişkənliyə malikdir. Nitroqliserinin təsiri tez başlayır, effekt 1-1,5 dəqiqə ərzində inkişaf edir və təxminən 30 dəqiqə davam edir. Plazmada maksimal səviyyəsi təxminən 4 dəqiqə ərzində əldə olunur. Preparatın dilaltı qəbulundan sonra plazmadan yarımxaricolma dövrü 2,5-4,4 dəqiqə təşkil edir. Dövr edən nitroqliserin eritrositlərlə yaxşı bağlanır və qan damarlarının divarlarında toplanır. Plazma zülalları ilə bağlanması təxminən 60% təşkil edir. Nitroqliserinin xaric edilməsinin əsas yolu metabolitlərin sidiklə ekskresiyasıdır; qəbul edilən dozanın 1%-dən az hissəsi dəyişilməmiş şəkildə xaric olunur. Klinikaya qədər təhlükəsizlik tədqiqatları: Nitroqliserinin yüksək dozalarının siçanlara uzunmüddətli peroral yeridilməsindən sonra heç bir kanserogen təsir aşkar edilməmişdir, lakin siçovullarda eyni dozalar qaraciyərdə fibroz və ya şiş dəyişikliklərinin tezliyini artırmışdır. Reproduktiv toksiklik testlərində yüksək dozalarda istifadəsi zamanı siçan nəsillərin fertilliyinin azalması müşahidə edilmişdir, lakin bu tədqiqat preparatın teratogen təsirini aşkar etməmişdir.
İstifadəsinə göstərişlər
˗ Stenokardiya tutmalarının aradan qaldırılması;
˗ stenokardiya tutmalarının profilaktikası, o cümlədən, təcrübədə stenokardiya tutmalarına səbəb olan fiziki və ya zehni yüklənmədən əvvəl istifadə;
˗ sol mədəciyin kəskin çatışmazlığı (ürək astması) zamanı köməkçi terapiya;
˗ kəskin miokard infarktı zamanı dolma təzyiqinin azaldılması;
˗ koronaroqrafiya zamanı koronar arteriyaların spazmının profilaktikası.
Əks göstərişlər
˗ Təsiredici maddəyə və ya “Tərkibi” bölməsində sadalanan hər hansı köməkçi maddələrə qarşı yüksək həssaslıq;
˗ aşağı dolma təzyiqi ilə kəskin miokard infarktı;
˗ aşağı dolma təzyiqi ilə sol mədəciyin çatışmazlığı;
˗ hipertrofik obstruktiv kardiomiopatiyanın səbəb olduğu stenokardiya, çünki bu vəziyyət qanın atılmasına mane ola bilər;
˗ birincili ağciyər hipertenziyası (çünki kifayət qədər ventilyasiya olmayan alveolyar zonaların hiperemiyası hipoksiyaya səbəb ola bilər). Bu risk xüsusilə ürəyin işemik xəstəliyi olan pasiyentlərdə yüksəkdir. ˗ nitroqliserin fosfodiesteraza-5 inhibitorlarını (sildenafil, vardenafil, tadalafil) istifadə edən pasiyentlərdə əks göstərişdir (“Digər dərman vasitələri ilə qarşılıqlı təsiri” bölməsinə baxın);
˗ kəllədaxili təzyiqin mümkün ola bilən yüksəlməsi ilə müşayiət olunan istənilən vəziyyət (məsələn, beyindaxili qansızma və ya kəllə-beyin travması);
˗ nitratların və həll olunan quanilat-siklaza stimulyatoru riosiquatın eyni zamanda istifadəsi əks göstərişdir (“Digər dərman vasitələri ilə qarşılıqlı təsiri” bölməsinə baxın).
Xüsusi göstərişlər və ehtiyat tədbirləri
Nitroqliserin ürəyin dəqiqəlik həcminin saxlanılması üçün adekvat venoz qayıdış (preyüklənmə) vacib olan pasiyentlərdə ehtiyatla istifadə edilməlidir (məsələn, sirkulyator şok, o cümlədən diastolik dolma təzyiqinin qeyri-kafi olduğu hipovolemik və kardiogen şok, kollaps, ağır mitral stenoz, perikard tamponadası, konstriktiv perikardit, ortostatik disfunksiya), çünki damargenişləndirici preparatların istifadəsi onların klinik vəziyyətini pisləşdirə bilər. Nəzərəçarpan hipotenziya (sistolik təzyiq 90 mm c.süt.-dan aşağı) və kardiogen şok zamanı (aortadaxili kontrapulsasiya və ya müsbət inotrop təsir göstərən preparatlarla tələb olunan sol mədəciyin son diastolik təzyiqi saxlanmadığı hallar istisna olmaqla) nitroqliserin ehtiyatla istifadə edilməlidir. Nitroqliserin serebrovaskulyar xəstəlikləri olan pasiyentlərdə ehtiyatla istifadə edilməlidir, çünki hipotenziya xəstəliyin simptomlarını artıra bilər. Nitroqliserin ağciyər xəstəliyi və “ağciyər ürəyi” (cor pulmonale) olan pasiyentlərdə hipoksemiyanı pisləşdirə bilər. Miokard infarktı olan pasiyentlərdə, ehtimal ki, reflektor mənşəli bradikardiya ilə arterial hipotenziya inkişaf edə bilər. Sol mədəciyin hipertrofiyası və aorta stenozu olan pasiyentlərdə taxikardiyanın mənfi təsiri və aortada diastolik təzyiqinin azalması səbəbindən nitroqliserinin istifadəsi nəzəri olaraq miokardın qan təchizatını poza bilər. Qapaq mənşəli aorta stenozu olan və ürəyin işemik xəstəliyi olan, eləcə də bu cür pozğunluqları olmayan az sayda pasiyentləri əhatə edən uzanıq vəziyyətdə aparılan hemodinamik tədqiqatın nəticələrinə görə, sublinqval nitroqliserinin istifadəsi zamanı heç bir əlavə təsir müəyyən edilməmişdir. Bununla belə, stenokardiya və eyni vaxtda qapaq mənşəli ağır aorta stenozu olan pasiyentlərin ambulator müalicəsində ehtiyatlı olmaq lazımdır. Ortostatik hipotoniyaya meylli pasiyentlərdə xüsusi ehtiyatlı olmaq və onların ciddi tibbi monitorinqi aparılmalıdır. Preparatın qapalı bucaqlı qlaukoma və ya miqreni olan pasiyentlərdə istifadəsi zamanı ehtiyatlı olmaq lazımdır. Nitratlara qarşı həssaslıq müxtəlif pasiyentlərdə çox fərqlənə bilər. Bunu dozanın seçilməsi zamanı həmişə nəzərə almaq lazımdır. Preparatın uzunmüddətli, xüsusən də yüksək dozalarda istifadəsi tolerantlığa səbəb ola bilər. Nitroqliserin sidiklə katexolaminlərin və VBT-nin (vanililbadam turşusu) xaric olmasını gücləndirir. Ağır qaraciyər və ya böyrək xəstəliyi, hipotireoz, mitral qapağın prolapsı, hipotermiya, tükənmə, həmçinin son vaxtlar miokard infarktı keçirən pasiyentlərdə nitroqliserinin istifadəsi zamanı ehtiyatlı olmaq lazımdır. Son zamanlarda miokard infarktı və ya kəskin ürək çatışmazlığı keçirən pasiyentlərdə nitroqliserin ilə müalicə ciddi tibbi nəzarət altında və hemodinamik parametrlərin monitorinqi ilə aparılmalıdır. Ağır anemiya, o cümlədən qlükoza-6-fosfat dehidrogenaza çatışmazlığı səbəbindən nitroqliserinin biotransformasiyasının azalması nəticəsində arterial hipoksemiya inkişaf etdirə bilən pasiyentlərdə istifadəsi zamanı ehtiyatlı olmaq lazımdır. Hipoksemiya və ağciyər xəstəliyi və ya ürək işemik çatışmazlığı ilə əlaqəli ventilyasiya və perfuziya arasında balansın pozulması olan pasiyentlərdə istifadə edildikdə ehtiyatlı olmaq lazımdır. Stenokardiya, miokard infarktı və ya beyin işemiyası olan pasiyentlərin kiçik tənəffüs yollarında tez-tez dəyişikliklər olur (alveolyar hipoksiya xüsusilə xarakterikdir). Bu şəraitdə alveolyar hipoksiyası olan bölgələrdən perfuziyanı daha yaxşı ventilyasiya olan ağciyər bölgələrinə yenidən paylamaq üçün ağciyərlərdə yerli vazokonstriksiya baş verir (Eyler-Lillestrand mexanizmi, “Əlavə təsirlər” bölməsinə baxın). Nitroqliserin, güclü vazodilatator kimi, qoruyucu vazokonstriksiyanın inkişafını dayandıra bilər, bu da ağciyərin zəif ventilyasiya olan bölgələrinin perfuziyasının artmasına səbəb olur. Bu, ventilyasiya və perfuziya arasında balansın pozulmasına gətirib çıxarır, arterial qanda oksigenin qismən təzyiqinin daha da azalmasına səbəb olur. Pasiyentə məlumat verilməlidir ki, əgər stenokardiyanın simptomları preparatın üç dozasından sonra yaxşılaşmırsa, dərhal həkimə müraciət etməlidir (“İstifadə qaydası və dozası” bölməsinə baxın). Köməkçi maddələr haqqında xüsusi məlumat Preparatın hər dozasında (klapanın üzərinə bir dəfə basıldıqdan sonra) 39,6 mq 96% etanol (alkoqol) vardır. Bir dozada etanolun miqdarı 1 ml pivə və ya 1 ml şərabda olan alkoqoldan azdır. Belə əhəmiyyətsiz miqdarda etanolun effekti yoxdur. Preparatın tərkibində dərinin qıcıqlanmasına səbəb ola bilən propilenqlikol vardır. Uyuşmazlıq İstifadə olunmur.
Digər dərman vasitələri ilə qarşılıqlı təsiri
Yanaşı istifadəsi əks göstərişdir. Fosfodiesteraza tip 5 inhibitorlarının azot oksidi (NO)/sikloquanozin monofosfat (sQMF) yoluna məlum təsirlərini nəzərə alaraq, sildenafil, vardenafil və tadalafil kimi preparatlar nitratların antihipertenziv təsirini gücləndirə bilər və bu səbəbdən onların nitroqliserinlə eyni vaxtda istifadəsi əks göstərişdir (“Əlavə təsirləri” bölməsinə baxın). Nitratların və həll olunan quanilat-siklazanın stimulyatoru olan riosiquatın birgə istifadəsi əks göstərişdir. Preparatın istifadəsi zamanı alkoqollu içkilərin istifadəsi qəti qadağandır. Aşağıdakı dərman vasitələrlə kombinasiyada ehtiyatlı olmaq lazımdır: Nitroqliserinin hipotenziv təsirini gücləndirə bilən digər antihipertenziv preparatlar (məsələn, vazodilatatorlar və antihipertenziv preparatlar, beta-blokatorlar, kalsium kanalların blokatorları, neyroleptiklər, trisiklik antidepressantlar və sapropterin). Yuxarıda göstərilən preparatlara əlavə olaraq, nitroqliserin istifadəsi zamanı hipotenziya və sinkope riski aşağıdakı hallarda arta bilər:
˗ alkoqolun istifadəsi zamanı;
˗ nitroqliserinin vazodilatator təsirini gücləndirə bilən N-asetilsisteinin istifadəsi zamanı;
˗ dihidroerqotaminin (onun biomənimsənilməsi arta bilər) istifadəsi zamanı. Koronar arteriyaların xəstəliyi olan pasiyentlərdə dihidroerqotaminin istifadəsi zamanı xüsusi diqqət tələb olunur, çünki o, nitroqliserinin təsirinin antaqonistidir, bu da koronar damarların vazokonstriksiyasına səbəb ola bilər); ˗ heparinin istifadəsi zamanı. Müşahidələr var ki, nitratların müntəzəm istifadəsi zamanı heparinin effektivliyi azala bilər. Müntəzəm istifadə edilən nitratlarla yanaşı heparinin yanaşı təyini zamanı onun təsirinin erkən və tez-tez monitorinqi tələb olunur. Heparinin təsiri azala bilər;
˗ əvvəllər üzvi nitratlarla (məsələn, izosorbit dinitrat və ya mononitrat) müalicə alan pasiyentlərə nitroqliserinin yüksəldilmiş dozası tələb oluna bilər;
˗ nitroqliserinə terapevtik reaksiyanı pisləşdirə bilən qeyri-steroid iltihab əleyhinə preparatların (QSİƏP) istifadəsi (asetilsalisil turşusu istisna olmaqla); Nitroqliserinin amifostin və asetilsalisil turşusu ilə birgə istifadəsi nitroqliserinin hipotenziv təsirini gücləndirə bilər. Nitroqliserinin uzunmüddətli təsirli nitratlarla eyni zaman istifadəsi zamanı nitroqliserinə tolerantlıq yarana bilər.
Hamiləlik və laktasiya dövründə istifadəsi
Hamiləlik: Heyvanlar üzərində aparılan təcrübələr preparatın hamiləliyə, embrion/dölün inkişafına, doğuşa və ya doğuşdan sonrakı inkişafa heç bir mənfi təsirini aşkar etməmişdir. Lakin bu nəticələrin insanlarda əhəmiyyəti məlum deyil. Hamiləlik dövründə nitroqliserinin istifadəsi yalnız ana üçün gözlənilən fayda döl üçün mümkün riskdən üstün olduqda mümkündür. Laktasiya dövrü: Nitroqliserinin insan ana südü ilə xaric olub-olmadığı məlum deyil. Laktasiya zamanı körpə üçün mümkün riski istisna etmək olmaz. Ana südü ilə qidalanmanın uşaq üçün faydasının və preparatla müalicənin ana üçün faydasının hərtərəfli müqayisəsi əsasında ana südü ilə qidalandırmanın dayandırılması və ya nitroqliserinin istifadəsinin dayandırılması barədə qərar qəbul edilməlidir. Fertillik Heyvanlar üzərində aparılan təcrübələr reproduktiv sisteminə mənfi təsirini aşkar etməmişdir. Lakin bu nəticələrin insanlarda əhəmiyyəti məlum deyil (“Klinikaya qədər təhlükəsizlik tədqiqatları” bölməsinə baxın).
Nəqliyyat vasitəsini və digər potensial təhlükəli mexanizmləri idarəetmə qabiliyyətinə təsiri
Nitroqliserinin istifadəsindən sonra başgicəllənmə və ya bayılma barədə məlumatlar vardır və bu səbəbdən qəza riski olan fəaliyyət növlərilə məşğul olduqda ehtiyatlı olmaq lazımdır. Müalicənin başlanğıcında pasiyentlərə nəqliyyat vasitələrini və mexanizmləri idarə etmək tövsiyə olunmur. Gələcəkdə məhdudiyyətlərin dərəcəsi fərdi olaraq müəyyən edilir.
NİTROMİNT İstifadə qaydası və dozası
Dozalanma rejimi :Böyüklər Stenokardiyanın kəskin tutmasının aradan qaldırılması Stenokardiyanın tutmasının başlanğıcında dilin altına bir doza (1 doza - 400 mikroqram) püskürtmək lazımdır. Simptomlar davam etdikdə, dozalanma 5 dəqiqəlik fasilələrlə cəmi üç aerozol dozasından (klapanın üzərinə basmaq) çox olmamaq şərti ilə təkrarlana bilər. Aerozolun üç dozasının təkrar istifadəsindən sonra simptomlar yox olmadıqda, pasiyent dərhal həkimə müraciət etməlidir. Simptomatik hipotenziyanın inkişaf riski səbəbindən preparatı oturmuş vəziyyətdə istifadə etmək tövsiyə olunur. Stenokardiyanın profilaktikası Yüklənmə zamanı və ya stenokardiyaya səbəb olan digər vəziyyətlərdə stenokardiyanın profilaktikası üçün fiziki yüklənmədən dərhal əvvəl aerozolun bir dozasını (400 mkq) dilin altına püskürtmək tövsiyə olunur. Kəskin kardiogen ağciyər ödeminin müalicəsi Hipotenziya olmadan kəskin kardiogen ağciyər ödemi olan pasiyentlərin müalicəsi üçün (sistolik qan təzyiqi 100 mm c.süt.-dan çox) dilin altına bir dozanın (0,4 mq nitroqliserin) püskürtməsi tövsiyə olunur. Effekt kifayət qədər olmadıqda, arterial təzyiqin nəzarəti daxil olmaqla, pasiyentin klinik vəziyyətinin ciddi nəzarəti ilə eyni doza 5-10 dəqiqəlik fasilələrlə təkrarlana bilər. Pasiyentin ehtiyacına və preparata klinik cavabına uyğun olaraq, sonradan pasiyentlər venadaxili formaya və ya başqa damargenişləndirici preparata keçirilə bilərlər. Kəskin miokard infarktı zamanı dolma təzyiqinin azaldılması Tövsiyə olunan doza arterial təzyiqin nəzarəti altında (sistolik təzyiq 100 mm c.süt.-dan yuxarı olmalıdır) 0,4 -1,2 mq (1-3 doza yeridilir) təşkil edir. Koronaroqrafiyadan əvvəl: Profilaktika məqsədi ilə koronaroqrafiyadan əvvəl 1-2 dozanın (0,4-0,8 mq) yeridilməsi tövsiyə olunur.
Xüsusi pasiyent qrupları
Yaşlı pasiyentlər: Yaşlı pasiyentlərdə nitratların istifadəsi zamanı hipotenziya və bayılma baş verə bilər. Pasiyentlərə sublinqval nitroqliserinin mümkün olduqda, oturaq vəziyyətdə istifadəsi tövsiyə edilməlidir. 18 yaşdan kiçik uşaqlar və yeniyetmələr Bu günə qədər uşaqlarda və yeniyetmələrdə nitroqliserinin istifadəsi ilə bağlı heç bir məlumat yoxdur. Nitroqliserinin 18 yaşdan kiçik uşaqlarda və yeniyetmələrdə istifadəsi tövsiyə edilmir. İstifadə qaydası Dilaltı istifadə üçün məhlul, püskürdücü başcığı və qoruyucu qapağı olan dozalandırıcı nasosla təchiz olunmuş plastik və ya alüminium sprey balonlarında buraxılır. Plastik silindr ilk açılış nəzarəti olan qoruyucu halqa ilə təchiz edilmişdir . Birinci nəzarətə malik qoruyucu halqanın qapaqdan çıxarılması - Qoruyucu qapağın çıxarılması: qoruyucu halqa çıxarıldıqdan sonra balonu bir əldə tutaraq, digər əllə qoruyucu qapağı plastik balondan asanlıqla çıxarmaq olar. Preparatın alüminium balonda istifadəsi zamanı, qoruyucu qapağı asanlıqla çıxarmaq olar– Birinci nəzarətə malik qoruyucu halqası olmayan alüminium balondan qoruyucu qapağın çıxarılması İlk istifadədən əvvəl dozalandırıcı klapanını maye ilə doldurmaq lazımdır. Bunu etmək üçün qoruyucu qapağı çıxarmaq və klapanın deşiyini havaya istiqamətləndirməklə, aerozol əmələ gələnədək klapana basmaq lazımdır. Cihaz uzun müddət istifadə edilmədikdə, doldurma prosedurunu təkrarlamaq tələb oluna bilər. İstifadədən əvvəl balonu silkələməyə ehtiyac yoxdur. Dozalandırıcı klapanının yuxarıda olmağı üçün balonu şaquli saxlamaq lazımdır. Püskürdücü klapanın deşiyini ağıza imkan daxilində yaxın tutmaq və aerozolu dilin altına püskürtmək lazımdır. Püskürtmədən dərhal sonra ağızı bağlamaq lazımdır. Aerozolla nəfəs almaq olmaz və bu səbəbdən püskürtmə zamanı nəfəsi saxlamaq lazımdır. Pasiyentlərə göstərilməlidir ki, dozalandırıcı klapanın deşiyini əllə yoxlamaqla tapmaq asandır, çünki bu, preparatdan gecələr istifadə etməyə imkan verir. Aerozoldan oturmuş vəziyyətdə istifadə etmək tövsiyə olunur.
Əlavə təsirləri
Nitromint preparatının dilaltı aerozolun istifadəsi zamanı müşahidə edilən və orqanizm sistemlərinə görə təsnif edilən əlavə təsirlər aşağıdakı ardıcıllıqla verilmişdir: çox tez-tez (>1/10); tez-tez (1/100); bəzən (1/1000); nadir (<1/1000); çox nadir (<1/10,000).
Qan və limfa sisteminin pozğunluqları
Çox nadir: Methemoqlobinemiya
Psixikanın pozğunluqları
Çox nadir: Narahatlıq
Sinir sisteminin pozğunluqları
Çox tez-tez Baş ağrısı1 ,
Tez-tez Başgicəllənmə Yuxululuq
Bəzən: Sinkope
Çox nadir: Beyin işemiyası
Ürək pozğunluqları
Tez-tez Taxikardiya
Bəzən Stenokardiyanın siptomlarının pisləşməsi (nitratlara qarşı paradoksal reaksiya) Bradikardiya Sianoz
Məlum deyil Güclü ürək döyüntüsü
Damar pozğunluqları
Tez-tez Ortostatik hipotenziya
Bəzən Üzə qanaxını Damar kollapsı
Tənəffüs sistemi, döş qəfəsi və divararalığı orqanlarının pozğunluqları
Çox nadir Tənəffüs çatışmazlığı
Mədə-bağırsaq traktının pozğunluqları
Bəzən Ürəkbulanma Qusma
Çox nadir Qıcqırma Halitoz (ağızdan xoşagəlməz qoxu)
Dəri və dərialtı toxumaların pozğunluqları
Çox nadir Eksfoliativ dermatit Dərman vasitəsi səbəbindən yaranan səpgi
Ümumi pozğunluqlar və yerdilmə nahiyəsində pozğunluqlar
Tez-tez Asteniya Laborator və instrumental tədqiqatların nəticələrinə təsiri
Tez-tez Arterial təzyiqin azalması Nitroqliserinin səbəb olduğu hipotenziya beyin işemiyasına səbəb ola bilər. Bəzi hallarda, xüsusən müalicənin ilkin mərhələlərində və dozanın artırılmasından sonra başgicəllənmə və zəiflik hissi ilə reflektor taxikardiya baş verə bilər. Bəzi hallarda kollaps bradiaritmiya və sinkope ilə müşayiət oluna bilər. Yüksək dozalarda nitroqliserin ürəkbulanma, sianoz, narahatlıq, methemoqlobinemiya və tənəffüs çatışmazlığına səbəb ola bilər. Nitroqliserinlə müalicə zamanı alveolların zəif ventilyasiya olan nahiyələrində qan axınının nisbi dəyişməsi səbəbindən müvəqqəti hipoksemiya inkişaf edə bilər. Allergik reaksiyalar və yüksək həssaslıq inkişaf edə bilər. Dövri terapiya zamanı baş ağrıları davam etdikdə, yüngül analgetiklərdən istifadə edilməlidir. Preparat ağızda yüngül, qısamüddətli yanma hissi yarada bilər. Əlavə təsirlərin bildirilməsi
Şübhəli əlavə təsirlər haqqında məlumatların bildirilməsi preparatın risk/fayda nisbətinin davamlı monitorinqini təmin etmək üçün çox vacibdir. Səhiyyə işçilərinə hər hansı şübhəli əlavə təsirlər haqqında məlumatı təlimatın sonunda sadalanan əlaqə məlumatları vasitəsilə və həmçinin milli hesabat sistemi vasitəsilə təqdim etmək tövsiyə olunur.
Doza həddinin aşılması
Doza həddinin aşılmasının simptomları Doza həddinin aşılmasının simptomları, adətən, preparatın terapevtik istifadəsi zamanı müşahidə olunanlara bənzəyir, lakin reaksiyaların dərəcəsi və/ya ağırlığı daha şiddətli ola bilər (“Əlavə təsirləri” bölməsinə baxın). Çox yüksək dozaların istifadəsi zamanı, serebral simptomlarının inkişafı ilə kəllədaxili təzyiq arta bilər. Bundan əlavə, mədə-bağırsaq traktının (kolika, diareya) reaksiyaları müşahidə edilmişdir. Həddindən artıq yüksək dozalar methemoqlobinemiya, sianoz, təngənəfəslik və taxipnoeya gətirib çıxarır. Müalicəsi: Doza həddinin aşılması halında pasiyentin klinik vəziyyəti, o cümlədən həyati vacib funksiyaları və psixi vəziyyəti qiymətləndirilməlidir. Klinik göstəricilərdən və ya milli toksikoloji mərkəzlərinin tövsiyələrindən asılı olaraq, ürək-damar və tənəffüs sistemlərinin funksiyalarını dəstəkləyən terapiya istifadə edilməlidir. Yüngül hipotenziya hallarında pasiyent ayaqları qaldırılmış və/və ya başı aşağı olmaqla uzanmış vəziyyətdə yerləşdirilməlidir. Qanda qazların konsentrasiyasını müəyyən etmək lazımdır. Asidoz və ya sianozun klinik əlamətləri yarandıqda, ağır methemoqlobinemiyanın inkişafı nəzərə alınmalıdır. G-6-FDG çatışmazlığı olan pasiyentlər istisna olaraq, methemoqlobinemiya inkişaf etdirən pasiyentlərə oksigen terapiyası ilə yanaşı metilen abısı 5 dəqiqə ərzində 1-2 mq/kq bədən çəkisinə venadaxili yeridilməlidir.
Buraxılış forması
10 q və püskürdücü başcığı qoruyucu qapağı olan dozalandırıcı nasosla təchiz olunmuş şəffaf SOS (sikloolefin sopolimer) balonda və ya alüminium balonda. 1 balon içlik vərəqə ilə birlikdə karton qutuya qablaşdırılır.
Aptekdən buraxılma şərti
Resept əsasında buraxılır.