Pharmed
KARDIOMAGNIL 150/30,39MG N30 TB (GER)
KARDİOMAQNİL örtüklü tabletlər
CARDIOMAGNYL
Beynəlxalq patentləşdirilməmiş adı: Acetylsalicylic acid + Magnesium hydroxide
Tərkibi
Təsiredici maddələr: 1 tabletin tərkibində 75 mq və ya 150 mq asetilsalisil turşusu, 15,2 mq və
ya 30,39 mq maqnezium hidroksid vardır.
Köməkçi maddələr: qarğıdalı nişastası, mikrokristallik sellüloza, maqnezium stearat, kartof
nişastası, hipromelloza (metilhidroksipropilsellüloza 15), propilenqlikol, talk.
Təsviri
Kardiomaqnil 75 mq/15,2 mq
Ağ rəngli, “ürək” formasında örtüklü tabletlərdir.
Kardiomaqnil 150 mq/30,39 mq
Ağ rəngli, oval formalı, bir tərəfində bölünmə xətti olan örtüklü tabletlərdir.
Farmakoterapevtik qrupu
Antiaqreqant vasitə.
ATC kodu: B01AC30.
Farmakoloji xüsusiyyətləri
Farmakodinamikası
Asetilsalisil turşusunun (AST) təsir mexanizminin əsasında onun tərəfindən siklooksigenazanın
(SOG-1) geri dönməyən inhibə olunmasıdır, bunun nəticəsində tromboksan A2 sintezi blokada
edilir və trombositlərin aqreqasiyası dayanır. Trombositlərin aqreqasiya prosesində asetilsalisil
turşusunun (AST) digər təsir mexanizmləri də mövcudluğu hesab edilir ki, bu da müxtəlif damar
xəstəliklərində onun istifadə sahəsi genişlənir. AST, eləcə də ağrıkəsici, iltihab əleyhinə və
qızdırmasalıcı effektə malikdir.
Kardiomaqnil preparatının tərkibində olan maqnezium hidroksid mədə-bağırsaq traktının selikli
qişasını asetilsalisil turşusunun təsirindən qoruyur.
Farmakokinetikası
Asetilsalisil turşusu
Sorulması
Daxilə qəbul edildikdən sonra AST mədə-bağırsaq traktından (MBT) tez və tamamilə sorulur.
Sorulması zamanı və sorulmasından sonra AST əsas metabolit olan salisil turşusuna (ST) çevrilir.
AST daxilə qəbulundan sonra qan plazmasında maksimal konsentrasiyaya 20 dəqiqədən, ST 1-2
saatdan sonra çatır. Qida ilə eyni vaxtda qəbulu zamanı sorulma səviyyəsinə təsir etmədən AST-nin
sorulmasının ləngiməsi qeyd edilir. AST-nin biomənimsənilməsi təqribən 70%-dir, lakin bu
göstərici əhəmiyyətli dərəcədə dəyişir, belə ki, AST ST-yə fermentlərin təsiri altında presistem
hidrolizə məruz qalır (mədə-bağırsaq traktının selikli qişası, qaraciyər). ST-nin biomənimsənilməsi
80-100% təşkil edir.
Paylanması
AST və ST qan plazmasının zülalları ilə əhəmiyyətli dərəcədə birləşir və tez zamanda orqanizmdə
paylanır. ST-nin qan plazmasının zülalları ilə birləşmə dərəcəsi konsentrasiyadan asılıdır. Salisil
turşusu plasentadan keçir və ana südü ilə xaric olur.
Metabolizmi
AST-nin əsas metaboliti salisil turşusudur. Salisil turşusunun metabolizmi salisilsidik turşusunun,
salisil turşusunun fenol qlükuronidinin, salisilqlükuronidin və hentizin turşusunun yaranması ilə
qaraciyərdə baş verir.
Xaric olması
AST-nin yarımxaricolma dövrü 15 dəqiqəyə yaxın təşkil edir, belə ki, fermentlərin iştirakı ilə AST
tez zamanda bağırsaqda, qaraciyərdə və qan plazmasında ST-yə hidrolizə olunur. ST-nin
yarımxaricolma dövrü təqribən 3 saat təşkil edir, lakin o ferment sisteminin doyması nəticəsində
AST-nin yüksək dozasının (3,0 q-dan artıq) eyni vaxtda yeridilməsi zamanı əhəmiyyətli dərəcədə
arta bilər. Salisil turşusu və onun metabolitləri, əsasən, böyrəklər vasitəsilə xaric olur.
Maqnezium hidroksid
Sorulması
Maqnezium hidroksid kiçik absorbsiyaya malikdir və sistem təsir göstərmir.
Paylanması və metabolizmi
Maqnezium hidroksid metabolizmə məruz qalmır.
Xaric olması
Maqnezium hidroksid bağırsaq vasitəsilə xaric olur.
Maqnezium hidroksidin istifadə edilən dozası asetilsalisil turşusunun biomənimsənilməsinə təsir
etmir.
İstifadəsinə göstərişlər
Qeyri-stabil stenokardiya və stabil stenokardiya.
Təkrar miokard infarktının profilaktikası.
Əvvəl beyin qan dövranı pozuntusu keçirmiş pasiyentlərdə təkrar tranzitor işemik həmlənin (TİH)
və təkrar işemik insultun profilaktikası.
Əməliyyatdan və damarlarda invaziv müdaxilədən sonrakı trombotik ağırlaşmanın (aortokoronar
şuntlama, yuxu arteriyasının endarterektomiyası, arteriya-venoz şuntlama, koronar arteriyaların
angioplastikası və stent qoyulması, yuxu arteriyalarının angioplastikası kimi) profilaktikası.
Əks göstərişlər
Preparatın istənilən komponentinə və digər QSİƏP-ə qarşı yüksək həssaslıq, baş beyində qansızma;
qanaxmaya meyllilik (K vitamininin çatışmazlığı, trombositopeniya, hemorragik diatez);
salisilatların və QSİƏP qəbulu ilə güclənən bronxial astma; burun və burunətrafı boşluğun
polipozunu və SOQ-2 inhibitorları daxil olmaqla, asetilsalisil turşusunun və digər QSİƏP-ə qarşı
dözümsüzlüyü residivləşdirən tam və ya natamam bronxial astma (o cümlədən, anamnezdə); mədəbağırsaq sisteminin eroziv-xoralı zədələnməsi (kəskinləşmə fazasında); mədə-bağırsaq qanaxması;
qaraciyər funksiyasının ağır pozuntusu; ağır böyrək çatışmazlığı (kreatininin klirensi 30 ml/dəqiqə);
NYHA təsnifatı üzrə III-IV funksional sinfə malik xroniki ürək çatışmazlığı; hamiləlik (hamiləliyin
I trimestri, 20 həftədən artıq dövrdə olan II trimestri və III trimestri); laktasiya dövrü; qlükoza-6-
fosfatdehidrogenaza defisiti; metotreksatla (həftədə 15 mq-dan artıq) eyni vaxtda qəbulu; 18 yaşa
qədər uşaqlar.
Xüsusi göstərişlər və ehtiyat tədbirləri
Ehtiyatla
Podaqra, hiperurekiya, anamnezdə mədə-bağırsaq traktının xoralı zədələnməsi və ya mədə-bağırsaq
qanaxması, qaraciyər funksiyasının pozulması, böyrək funksiyasının pozulması, bronxial astma,
pollinoz, burun polipozu, analgetiklərə qarşı yüksək həssaslıq, iltihab əleyhinə preparatlarla,
revmatizm əleyhinə preparatlarla, eləcə də digər maddələrə qarşı allergik reaksiyalar zamanı,
ehtimal edilən cərrahi müdaxilə (əhəmiyyətsiz olduqda belə, məsələn, dişlərin ekstraksiyası);
hamiləliyin II trimestri zamanı 20 həftəyə qədər dövrdə ehtiyatlı olmaq lazımdır.
Aşağıdakı preparatlarla yanaşı terapiya zamanı ehtiyatlı olmaq lazımdır: metotreksatla həftədə 15
mq-dan az; antikoaqulyantlar, trombolitik və ya digər antiaqreqant vasitələr; metamizol və QSİƏP
(o cümlədən ibuprofen, naproksen), diqoksin, daxilə qəbul üçün hipoqlikemik vasitələr
(sulfonilsidik cövhəri törəmələri) və insulin, valproy turşusu, etanol, serotoninin geriyə tutulmasının
selektiv inhibitorları).
Pasiyentdə yuxarıda sadalanan xəstəliklər olduqda, preparatı istifadə etməzdən əvvəl həkimlə
məsləhətləşməlidir.
Preparatı həkim təyinatından sonra istifadə etmək lazımdır.
AST bronxospazma, eləcə də bronxial astma tutmasına və digər yüksək həssaslıq reaksiyalarına
səbəb ola bilər. Risk faktoru anamnezdə bronxial astmanın, pollinozun, burun polipozunun, tənəffüs
sisteminin xroniki xəstəliklərinin, eləcə də digər preparatlara qarşı allergik reaksiyaların (məsələn,
dəri reaksiyaları, qaşınma, övrə) olmasıdır.
AST cərrahi müdaxilə zamanı və sonra müxtəlif dərəcəli ifadəolunmuş qanaxmaya səbəb ola bilər.
Planlaşdırılan cərrahi əməliyyatdan bir neçə gün əvvəl AST-nin kiçik dozasını qəbul edən
pasiyentlərdə işemik ağırlaşmanın inkişafı riskilə müqayisədə qanaxma riskinin inkişafı
qiymətləndirilməlidir. Qanaxmanın inkişafı riski əhəmiyyətli dərəcədə olduqda, AST-nin qəbulu
müvəqqəti dayandırılmalıdır. AST-nin antikoaqulyantlarla, trombolitiklərlə və antitrombositar
preparatlarla eyni vaxtda istifadəsi qanaxmanın inkişafının yüksək riskilə müşayiət edilir.
AST kiçik dozada meylli pasiyentlərdə (sidik turşusunun aşağı ekskresiyasına malik) podaqranın
inkişafına səbəb ola bilər.
AST-nin metotreksatla istifadəsi qanyaranma orqanlarında baş verən əlavə təsirlərin inkişafının
yüksək tezliyilə müşayiət edilir.
AST-nin yüksək dozası hipoqlikemik effekt göstərir ki, bunu da daxilə qəbul üçün hipoqlikemik
vasitələr və insulin alan şəkərli diabetli pasiyentlərə təyin etdikdə, nəzərə almaq vacibdir.
Sistem qlükokortikosteroidlərlə (QKS) və salisilatlarla eyni vaxtda istifadəsi zamanı nəzərə almaq
lazımdır ki, müalicə dövründə salisilatların qanda konsentrasiyası azalır, sistem
qlükokortikosteroidlərin (QKS) ləğv edilməsindən sonra isə salisilatların doza həddinin aşılması
mümkündür.
Metamizol və bəzi QSİƏP (o cümlədən ibuprofen, naproksen) AST-nin trombositlərin
aqreqasiyasına inhibəedici təsirini zəiflədə bilər. AST qəbul edən və metamizol və ya QSİƏP qəbul
etməyi planlaşdıran pasiyentlər bunu həkimlə müzakirə etməlidirlər (“Digər dərman vasitələri ilə
qarşılıqlı təsiri” bölməsinə bax).
AST-nin dozasının tövsiyə edilən terapevtik dozadan aşılması mədə-bağırsaq qanaxması riskilə
bağlıdır.
Aqreqant terapiya qismində yaşlı pasiyentlərdə AST-nin kiçik dozalarının uzun müddət qəbulu
zamanı mədə-bağırsaq qanaxmasının inkişaf riskilə əlaqədar ehtiyatlı olmaq lazımdır.
AST-nin alkoqolla eyni vaxtda istifadəsi zamanı mədə-bağırsaq traktının selikli qişasının
zədələnməsi və qanaxma vaxtının uzanması riski yüksəkdir.
Böyrək arteriyalarının zədələnməsi, xroniki ürək çatışmazlığı, hipovolemiya, iri həcmli cərrahi
müdaxilə, sepsis və ya kütləvi qanaxma halı nəticəsində yaranan böyrək funksiyası pozulmuş və ya
qan dövranı pozuntusu olan pasiyentlərdə Kardiomaqnil preparatını ehtiyatla istifadə etmək
lazımdır, belə ki, AST kəskin böyrək çatışmazlığının inkişafı və böyrək funksiyasının pozulması
riskini artıra bilər.
Qlükoza-6-fosfat-dehidrogenaza defisitinin ağır forması zamanı AST hemolizə və hemolitik
anemiyaya səbəb ola bilər. Hemolizin inkişafı riskini artıran faktorlar qızdırma, kəskin infeksiya və
preparatın yüksək dozasıdır.
AST tərkibli preparatlar uşaqlarda və yeniyetmələrdə qızdırma ilə və ya onsuz viruslu infeksiyaların
müalicəsi üçün həkim məsləhəti olmadan istifadə edilməməlidir. Müəyyən viruslu xəstəliklər,
əsasən A qripi, B qripi və suçiçəyi zamanı çox nadir hallarda, lakin həyat üçün təhlükəli olan, təcili
tibbi müdaxilə tələb edən Reye sindromunun inkişafı riski mövcuddur. AST yanaşı terapiya
qismində istifadə edildiyi halda risk arta bilər, lakin səbəb-nəticə əlaqəsi təsdiq edilməmişdir. Qeyd
edilən xəstəliklər zamanı azalmayan qusma Reye sindromunun simptomu ola bilər.
Preparatın müstəqil istifadəsi zamanı maksimal müddəti və tövsiyə edilən dozanı aşmaq olmaz.
Xəstəliyin simptomları azalmadıqda və ya ağırlaşdıqda, həkimə müraciət etmək məsləhət görülür.
Digər dərman vasitələri ilə qarşılıqlı təsiri
Kardiomaqnil preparatının metotreksatla eyni vaxtda istifadəsi böyrək klirensinin azalmasının və
plazma zülalları ilə birləşməsindən sıxışdırması hesabına metotreksatın hematoloji toksikliyinin
artmasına səbəb ola bilər. Həftədə 15 mq dozadan artıq metotreksatla istifadəsi əks göstərişdir.
Həftədə 15 mq metotreksatla istifadəsi pasiyent üçün olan fayda riskdən üstün olduqda, xüsusi
ehtiyatla mümkündür.
Preparatın tərkibində salisilatlar olan digər QSİƏP-lə yüksək dozada eyni vaxtda istifadəsi zamanı
ulserogen təsirin və mədə-bağırsaq qanaxmasının riskinin artması qeyd edilir.
AST ilə eyni vaxtda istifadə edildikdə, aşağıdakı dərman vasitələrinin təsiri güclənir:
böyrək klirensinin azalması və onun zülallarla birləşməsindən sıxışdırılması hesabına metotreksatın;
trombositlərin funksiyasının pozulması və dolayı antikoaqulyantların zülallarla birləşməsindən
sıxışdırılması hesabına heparinin və dolayı antikoaqulyantların;
trombolitik və antiaqreqant və antikoaqulyant preparatların;
böyrək ekskresiyasının azalması nəticəsində diqoksinin;
AST-nin yüksək dozada özünün hipoqlikemik xüsusiyyəti və qan plazmasının zülallarının
birləşməsindən sulfonilsidik cövhəri törəmələrini sıxışdırılması hesabına daxilə qəbul üçün
hipoqlikemik vasitələr (sulfonilsidik cövhəri törəmələri) və insulinin;
zülallarla birləşməsindən sıxışdırılması hesabına valproy turşusunun.
Metamizolla və bəzi QSİƏP-lə (o cümlədən ibuprofen və naproksen) eyni vaxtda (1 gün ərzində)
istifadəsi zamanı AST-nin təsirilə əlaqədar trombositlərin funksiyasının geridönməyən zəifləməsi
münasibətində antaqonizm qeyd edilir.
Bu effektin klinik əhəmiyyəti məlum deyil. AST-nin kardioprotektiv effektinin mümkün azalmasına
görə ürək-damar xəstəliklərinin yüksək riski olan pasiyentlərdə AST-nin metamizol və ya QSİƏP-lə
(o cümlədən ibuprofen və ya naproksen) eyni vaxtda istifadəsi məsləhət görülmür.
AST-nin etanolla (alkoqol) eyni vaxtda istifadəsi zamanı mədə-bağırsaq traktının selikli qişasının
zədələnməsinin və AST-nin və etanolun effektinin qarşılıqlı güclənməsi nəticəsində qanaxma
vaxtının uzanmasının yüksək riski qeyd edilir.
AST sidik turşusunun rəqib tubulyar eliminasiyasının nəticəsində urikozurik vasitələrin
(benzbromaron) təsirini zəiflədir.
Salisilatların, sistem qlükokortikosteroidlərin (QKS) eliminasiyanı gücləndirərək, onların təsirini
zəiflədir.
Antasidlər və kolestiramin preparatın sorulmasını azaldır.
AST-nin serotoninin geriyə tutulmasının selektiv inhibitorları ilə eyni vaxtda istifadəsi mümkün
sinergist effektin nəticəsində mədə-bağırsaq traktının yuxarı şöbəsindən qanaxma riskinin artmasına
səbəb ola bilər.
Diuretiklərin yüksək dozada AST ilə eyni vaxtda istifadəsi zamanı böyrəklərdə prostaqlandinlərin
sintezinin azalması nəticəsində yumaqcıq filtrasiyasının sürətinin azalması qeyd edilir.
Angiotenzinçevirici fermentin (AÇF) inhibitorlarının AST-nin yüksək dozada eyni vaxtda istifadəsi
zamanı damargenəldici xüsusiyyətə malik prostaqlandinlərin inhibə olunması nəticəsində yumaqcıq
filtrasiyasının sürətinin azalması qeyd edilir. Bundan başqa AÇF inhibitorlarının antihipertenziv
effektinin zəifləməsi qeyd edilir.
Pasiyent yuxarıda qeyd edilən və ya digər dərman vasitəsi qəbul etdikdə (o cümlədən reseptsiz),
preparatı qəbul etməzdən əvvəl həkimlə məsləhətləşməlidir.
Hamiləlik və laktasiya dövründə istifadəsi
Hamiləlik
Heyvanlar üzərində aparılan tədqiqatlar asetilsalisil turşusunun reproduktiv toksikliyini nümayiş
etdirmişdir. Hamiləliyin ilk 3 ayında yüksək dozada salisilatların istifadəsi, dölün inkişaf etməsində
qüsurların tezliyinin yüksəlməsi ilə assosiasiya olunur. Hamiləliyin I trimestrində tərkibində
asetilsalisil turşusu olan preparatların istifadəsi əks göstərişdir. Hamiləliyin II trimestrinin 20
həftəyə qədərki dövründə salisilatları, yalnız fayda/risk nisbəti ciddi qiymətləndirildikdən sonra
təyin etmək olar. Hamiləliyin 20-ci həftəsindən başlayaraq, su azlığı və və/və ya yenidoğulmuşlarda
böyrək patologiyasının (neonatal böyrək disfunksiyası) mümkün inkişafı ilə əlaqədar qadınlara
QSİƏP qəbulu əks göstərişdir.
Hamiləliyin son trimestrində salisilatların yüksək dozaları (300 mq/sutkadan artıq) doğuş
fəaliyyətinin tormozlanmasına, döldə arterial kanalın vaxtından tez bağlanmasına, anada və döldə
ciddi qanaxmaya, doğuşdan bilavasitə əvvəl təyini isə xüsusilə yarımçıq doğulmuş uşaqlarda
kəllədaxili qanaxmaya səbəb olur.
Laktasiya
Salisilatlar və onların metabolitləri az miqdarda ana südünə nüfuz edir. Laktasiya dövründə
preparatın istifadəsinin mümkün olub-olmamasını müəyyən edən əldə olan klinik məlumatlar
kifayət qədər deyil. Laktasiya dövründə asetilsalisil turşusunun təyin edilməsindən əvvəl preparatla
terapiyanın potensial faydasını südəmər uşaqlara potensial riskinin nisbətini qiymətləndirmək
lazımdır.
Nəqliyyat vasitələrini və digər potensial təhlükəli mexanizmləri idarəetmə qabiliyyətinə təsiri
AST preparatları ilə müalicə dövründə nəqliyyat vasitələrini idarə edərkən və yüksək diqqət və
sürətli psixomotor reaksiya tələb edən potensial təhlükəli fəaliyyət növlərilə məşğul olarkən ehtiyat
tədbirlərinə riayət etmək lazımdır.
İstifadə qaydası və dozası
Tabletlər bütöv şəkildə, su ilə udulur. İstənilən halda tableti yarıya bölmək, çeynəmək və ya əzmək
olar.
Qeyri-stabil və stabil stenokardiya
Tərkibində 75-150 mq AST olan 1 tablet Kardiomaqnil sutkada 1 dəfə.
Təkrar miokard infarktının profilaktikası
Tərkibində 75-150 mq AST olan 1 tablet Kardiomaqnil sutkada 1 dəfə.
Əvvəl beyin qan dövranı pozuntusu keçirmiş pasiyentlərdə təkrar tranzitor işemik həmlənin (TİH)
və təkrar işemik insultun profilaktikası
Tərkibində 75-150 mq AST olan 1 tablet Kardiomaqnil sutkada 1 dəfə.
Əməliyyatdan və damarlarda invaziv müdaxilədən (aortokoronar şuntlama, yuxu arteriyalarının
endarteriektomiya, arteriya-venoz şuntlama, koronar arteriyaların angioplasikası və stenti, yuxu
arteriyalarının angioplastikası kimi) sonrakı trombotik ağırlaşmanın profilaktikası
Tərkibində 75-150 mq AST olan 1 tablet Kardiomaqnil sutkada 1 dəfə.
Xüsusi qrup pasiyentlər
Böyrək funksiyası pozulmuş pasiyentlər
Kardiomaqnil preparatı böyrək funksiyasının ağır pozuntusu olan pasiyentlərə əks göstərişdir.
Böyrək funksiyası pozulmuş pasiyentlərdə Kardiomaqnil preparatını ehtiyatla istifadə etmək
lazımdır, belə ki, asetilsalisil turşusu böyrək çatışmazlığı və kəskin böyrək çatışmazlığının inkişafı
riskini artıra bilər (“Xüsusi göstərişlər və ehtiyat tədbirləri” bölməsinə bax).
Qaraciyər funksiyası pozulmuş pasiyentlər
Kardiomaqnil preparatı qaraciyər funksiyasının ağır pozuntusu olan pasiyentlərdə əks göstərişdir.
Qaraciyər funksiyası pozulmuş pasiyentlərdə Kardiomaqnil preparatını ehtiyatla istifadə etmək
lazımdır.
Uşaqlar
18 yaşa qədər uşaqlarda asetilsalisil turşusunun + (maqnezium hidroksid) preparatlarının
istifadəsinin təhlükəsizliyi və effektivliyi müəyyən edilməmişdir. Məlumat yoxdur. 18 yaşdan kiçik
pasiyentlərdə Kardiomaqnil preparatının istifadəsi əks göstərişdir.
Preparatı, yalnız təlimatda qeyd edilən göstərişlər, istifadə qaydası və dozalar üzrə qəbul etmək
lazımdır.
Əlavə təsirləri
Əlavə təsirlərin tezliyinin kriterisinin qiymətləndirilməsi: çox tez-tez (≥ 1/10); tez-tez (≥ 1/100 - <
1/10); bəzən (≥ 1/1000 - < 1/100); nadir hallarda (≥ 1/10000 - < 1/1000); çox nadir hallarda (<
1/10000); məlum deyil (əldə olan məlumatlara görə tezliyi qiymətləndirmək mümkün deyil).
Qan və limfa sistemində baş verən pozuntular: bəzən – dəmir defisitli anemiya (qanaxma ilə
əlaqədar); nadir hallarda – hemorragik anemiya; məlum deyil – hemoliz, hemolitik anemiya
(qlükoza-6-fosfat-dehidrogenazanın ağır formalı defisitilə əlaqədar).
İmmun sistemdə baş verən pozuntular: bəzən – hiperhəssaslıq, dərmana qarşı dözümsüzlük, allergik
ödem və angionevrotik ödem (Kvinke ödemi); nadir hallarda – anafilaktik reaksiyalar; məlum deyil
– anafilaktik şok.
Sinir sistemində baş verən pozuntular: tez-tez – başgicəllənmə; bəzən – hemorragik insult və ya
kəllədaxili qanaxma (letal sonluq halı < 0,1% eyni tezliklə AST terapiyası alan və plasebo alan
pasiyentlərdə rast gəlinmişdir).
Eşitmə orqanında və labirintdə baş verən pozuntular: tez-tez – qulaqlarda küy.
Ürəkdə baş verən pozuntular: məlum deyil – kardio-respirator distress sindromu (ağır allergik
reaksiyalarla əlaqədar).
Damarlarda baş verən pozuntular: bəzən – hematoma; nadir hallarda – hemorragiya, əzələ
qansızması; məlum deyil – tibbi prosedurlar zamanı qanaxma.
Tənəffüs sistemində, döş qəfəsi və divararalığı orqanlarında baş verən pozuntular: tez-tez – burun
qanaxması, rinit; bəzən – burun tutulması; məlum deyil – aspirinli bronxial astma.
Mədə-bağırsaq sistemində baş verən pozuntular: tez-tez – dispepsiya, mədə-bağırsaq sistemində və
qarın nahiyəsində ağrı, mədə-bağırsaq iltihabı, mədə-bağırsaq sistemindən qanaxma; bəzən –
damaqda qanaxma, mədə və onikibarmaq bağırsağın selikli qişasının xorası və eroziyası; nadir
hallarda – mədə və onikibarmaq bağırsağın selikli qişasının perforativ xorası.
Qaraciyərdə və öd yollarında baş verən pozuntular: bəzən – qaraciyər funksiyasının pozulması;
nadir hallarda - “qaraciyər” transaminazalarının aktivliyinin artması.
Dəridə və dərialtı toxumada baş verən pozuntular: tez-tez – dəri səpgisi, dəri qaşınması; bəzən –
övrə.
Böyrəklərdə və sidikçıxarıcı yollarda baş verən pozuntular: tez-tez – sidik-cinsiyyət yolundan
qanaxma; nadir hallarda – böyrək funksiyasının pozulması, kəskin böyrək çatışmazlığı (AST
tərkibli preparatla müalicəyə başlamazdan əvvəl böyrək funksiyasının pozulması və ya ürək-damar
pozuntusu olan pasiyentlərdə).
İçlik vərəqədə qeyd edilən əlavə təsirlər müşahidə edildikdə və ya dərinləşdikdə və ya pasiyent
təlimatda qeyd edilməyən istənilən digər əlavə təsir aşkar etdikdə, bu barədə həkimə məlumat
verməlidir.
Doza həddinin aşılması
Doza həddinin orta ağırlıq dərəcəli aşılması simptomları
Ürəkbulanma, qusma, qulaqlarda küy, eşitmənin pisləşməsi, başgicəllənmə, şüurun dumanlanması.
Müalicəsi
Mədənin yuyulması, aktivləşdirilmiş kömürün qəbulu. Müalicə simptomatikdir.
Doza həddinin ağır dərəcəli aşılması simptomları
Qızdırma, hiperventilyasiya, ketoasidoz, respirator alkaloz, koma, ürək-damar və tənəffüs
çatışmazlığı, ifadəolunmuş hipoqlikemiya.
Müalicəsi
Təxirəsalınmaz terapiyanın aparılması üçün ixtisaslaşdırılmış şöbəyə təcili hospitalizasiya-mədə
lavaji, turşu-qələvi balansının müəyyən olunması, qələvili və sürətli qələvili diurez, hemodializ,
məhlulların yeridilməsi, aktivləşdirilmiş kömür, simptomatik müalicə. Qələvili diurez zamanı pH
göstəricisi 7,5-8 olmalıdır. Sürətli qələvili diurez plazmada salisilatların konsentrasiyası böyüklərdə
500 mq/l (3,6 mmol) və uşaqlarda 300 mq/l-dən (2,2 mmol) çox olan zamanı aparılmalıdır.
Doza həddinin aşılması zamanı dərhal həkimə müraciət etmək vacibdir.
Buraxılış forması
75 mq +15,2 mq və ya 150 mq+30,39 mq örtüklü tabletlər.
30 və ya 100 tablet ağ rəngli, burulan qapaqla (polietilen) bağlanmış, ilkin açılmaya nəzarəti olan
silikagelli və halqalı, çıxarıla bilən kapsul quraşdırılmış, qəhvəyi rəngli şüşə flakonda. Hər flakona
etiket yapışdırılır. 1 flakon içlik vərəqə ilə birlikdə karton qutuya yerləşdirilir.
Saxlama şəraiti
25ºC-dən yüksək olmayan temperaturda və uşaqların əli çatmayan yerdə saxlamaq lazımdır.
Yararlılıq müddəti
3 il.
Yararlılıq müddəti bitdikdən sonra istifadə etmək olmaz.
Aptekdən buraxılma şərti
Reseptsiz buraxılır.
İstehsalçı/Qablaşdırıcı/Keyfiyyətə nəzarət
Takeda GmbH, Germany.
Lehnitzstrasse 70-98, 16515 Oranienburg, Germany.
Qeydiyyat vəsiqəsinin sahibi
“Nijfarm” SC, Rusiya.
603105, Nijniy Novqorod,
Salqanskaya k., ev 7.
Tel.: (831) 278-80-88.
Faks: (831) 430-72-28.
E-mail: med@stada.ru
İstehlakçılardan iradları qəbul edən təşkilat
“Nijfarm” SC, Rusiya.
603105, Nijniy Novqorod,
Salqanskaya k., ev 7.
Tel.: (831) 278-80-88.
Faks: (831) 430-72-28.
E-mail: med@stada.ru