Pharmed

CIANOKOBALAMIN 0,05% 1ML N10 AMP (B12) (BORISOV)

SİANOKOBALAMİN 500 mkq/ml inyeksiya üçün məhlul CYANOCOBALAMIN

Beynəlxalq patentləşdirilməmiş adı: Cyanocobalamin

SİANOKOBALAMİN Tərkibi

Təsiredici maddə: 1 ampulda (1 ml məhlulun tərkibində) 500 mkq sianokobalamin vardır.
Köməkçi maddələr: natrium xlorid, inyeksiya üçün su.

Təsviri
Şəffaf, qırmızı rəngli mayedir.

Farmakoterapevtik qrupu

Anemiyaəleyhinə preparatlar. Vitamin B12.

ATC kodu: B03BA01.

İstifadəsinə göstərişlər
Sianokobalamin çatışmazlığı ilə müşayiət olunan xroniki anemiyalar (Addison-Birmer xəstəliyi, alimentar makrositar anemiya) və həmçinin, dəmir çatışmazlığı, posthemorragik və aplastik anemiyaların kompleks müalicəsi, toksik maddələrin və/və ya dərman preparatlarının törətdikləri anemiyalar.
Sinir sistemi xəstəlikləri: polinevritlər, radikulitlər, kauzalgiyalar və nevralgiyalar (o cümlədən, üçlü sinirin nevriti), yan amiotrofik skleroz, periferik sinirlərin zədələnməsi, funikulyar miyeloz, uşaq serebral iflici, Daun xəstəliyi.
Dəri xəstəlikləri (psoriaz, fotodermatoz, herpesəbənzər dermatit, atopik dermatit). Xroniki hepatit, qaraciyər sirrozu, qaraciyər çatışmazlığı.
Kəskin şüa xəstəliyi.
Profilaktika məqsədi ilə - yüksək dozalarda biquanidlər, paraaminosalisil turşusu, askorbin turşusu təyin olunduqda, sianokobalaminin sorulmasının pozulması ilə müşayiət olunan mədə və bağırsaq xəstəlikləri (mədənin, nazik bağırsağın bir hissəsinin rezeksiyası, Kron xəstəliyi, seliakiya, malabsorbsiya sindromu, spru xəstəliyi).

Əks göstərişlər
Hiperhəssaslıq, tromboemboliya, eritremiya, eritroz, hamiləlik dövrü (B qrupu vitaminlərinin yüksək dozalarda teratogen təsir göstərməsi ehtimalı barədə bəzi göstərişlər mövcuddur), laktasiya dövrü, göstərilən dərman forması üçün 3 yaşa qədər uşaqlar. Leber xəstəliyi, nikotin
ambliopiyası (görmə sinirinin neyrodegenerativ zədələnməsinin riskini gücləndirir).
Gərginlik stenokardiyası III-cü FS, xoşxassəli və bədxassəli törəmələr (meqaloblast anemiya və B12 vitamin çatışmazlığı ilə müşayiət olunan hallar istisna olmaqla), trombların əmələ gəlməsinə meyllilik.

Xüsusi göstərişlər və ehtiyat tədbirləri
Dərman preparatının təyin edilməsindən əvvəl, sianokobalamin çatışmazlığı təsdiq olunmalıdır, çünki bu, fol turşusu çatışmazlığını maskalaya bilər.
Sianokobalaminlə aparılan müalicə zamanı, qanın hüceyrə tərkibinə və laxtalanma qabiliyyətinə sistematik nəzarət etmək lazımdır: müalicənin 5-8-ci günləri retikulositlərin miqdarı, dəmirin konsentrasiyası müəyyən olunur. Eritrositlərin, hemoqlobinin miqdarına və qanın rəng göstəricisinə 1 ay müddətində həftədə 1-2 dəfə və daha sonra, ayda 2-4 dəfə nəzarət etmək lazımdır. Hematoloji remissiya əldə olunduqdan sonra, 4-6 ayda ən azı 1 dəfə periferik qana nəzarət etmək lazımdır. Leyko- və eritrositozun inkişaf etməsinə meyllilik olduqda, preparatın dozasını aşağı salmaq və ya preparatla müalicəni müvəqqəti dayandırmaq lazımdır.
Trombəmələgəlməyə meylli olan pasiyentlərdə, stenokardiyadan əziyyət çəkən pasiyentlərdə preparatı ehtiyatla istifadə etmək lazımdır (dozaları bir inyeksiyada 100 mkq-dan çox olmamaq şərti ilə, aşağı salmaq lazımdır).
Yaşlı pasiyentlərdə tövsiyə olunan dozalarda istifadə etdikdə, aşağıda göstərilən əlavə təsirlərdən başqa effektlər qeyd olunmamışdır.
Əlavə reaksiyalar meydana çıxdığı hallarda, sianokobalaminin istifadəsinə müvəqqəti fasilə etmək və ya istifadəsini dayandırmaq lazımdır. Zərurət yarandıqda, preparatın aşağı dozalarından – 50 mkq – başlayaraq, müalicəni yenidən başlamaq olar.
Bu dərman preparatının hər ampulunda duzlar şəklində 3,5 mq natrium vardır. Natrium duzlarının istifadəsinə nəzarət edən pasiyentlər üçün bunu nəzərə almaq lazımdır.

Digər dərman vasitələri ilə qarşılıqlı təsiri
Askorbin turşusu, ağır metal duzları, tiamin bromid, piridoksin, riboflavin ilə farmasevtik cəhətdən uyuşmazdır.
Aminoqlikozidlər, polimiksin, tetrasiklinlər, salisilatlar, epilepsiyaəleyhinə dərman preparatları, kolxisin, kalium preparatları absorbsiyanı aşağı salırlar.
Sianokobalamin, tiaminin istifadəsi nəticəsində meydana çıxan allergik reaksiyaların inkişaf etməsini gücləndirir.
Xloramfenikol hemopoetik cavabı aşağı salır.
Qanın laxtalanma qabiliyyətini artıran dərman preparatları ilə birlikdə istifadə etmək olmaz. Sitamen – eyni zamanda istifadə edildikdə, sitamenin effekti aşağı düşür.
Peroral kontraseptivlər – qanda sianokobalaminin konsentrasiyasını aşağı salırlar. Antimetabolitlər və antibiotiklərin əksəriyyəti sianokobalaminin mikrobioloji tədqiqatlarının nəticələrinin dəyişməsinə səbəb olurlar.

Hamiləlik və laktasiya dövründə istifadəsi
Hamiləlik (B12 vitamininin yüksək dozalarda teratogen təsir göstərməsi ehtimalı barədə bəzi məlumatlar mövcuddur) və laktasiya dövründə sianokobalaminin istifadəsi əks göstərişdir. Pediatriyada istifadəsi
Preparatı 3 yaşdan yuxarı uşaqlarda istifadə etmək olar.

Nəqliyyat vasitəsini və digər potensial təhlükəli mexanizmləri idarəetmə qabiliyyətinə təsiri

Müalicə müddətində nəqliyyat vasitəsini idarə etməkdən və yüksək diqqət və sürətli psixomotor reaksiyalar tələb edən potensial təhlükəli fəaliyyət növləri ilə məşğul olmaqdan çəkinmək lazımdır.

SIANOKOBALAMIN İstifadə qaydası və dozası

Sianokobalamini dəri altına, əzələ daxilinə, vena daxilinə, funikulyar miyeloz, yan amiotrofik skleroz zamanı isə intralyumbal yolla yeritmək olar.
Böyüklər
Addison-Birmer anemiyası zamanı – dəri altına, günaşırı 100-200 mkq/sutkada; funikulyar miyeloz, sinir sistemi funksiyalarının pozğunluğu ilə müşayiət olunan makrositar anemiyalar zamanı – 400-500 mkq/sutkada birinci həftə hər gün, daha sonra yeridilmələr arasında 5-7 günə qədər intervallarla (eyni zamanda fol turşusu təyin etmək lazımdır); remissiya dövründə dəstəkləyici doza ayda 2 dəfə 100 mkq/sutkada, nevroloji hallar olduqda – ayda 2-4 dəfə 200- 400 mkq.
Kəskin posthemorragik və dəmir çatışmazlığı anemiyası zamanı – həftədə 2-3 dəfə 30-100 mkq, aplastik anemiya zamanı – klinik-hematoloji yaxşılaşma başlayana qədər 100 mkq.
Mərkəzi və periferik sinir sistemi xəstəliklərində, ağrı sindromu ilə müşayiət olunan nevroloji xəstəliklərdə preparatı artan dozalarda yeritmək lazımdır – ağrı sindromu aradan qaldırılana qədər 200-500 mkq/sutkada, daha sonra 2 həftə müddətində 100 mkq/sutkada. Periferik sinir sisteminin travmatik zədələnmələri mövcud olduqda – 40-45 gün müddətində günaşırı 200-400 mkq.
Hepatitlərdə və qaraciyər sirrozu zamanı – 25-40 gün müddətində 30-60 mkq/sutkada və ya günaşırı 100 mkq.
Kəskin şüa xəstəliyində, diabetik nevropatiyada – 20-30 gün müddətində hər gün 60-100 mkq. Funikulyar miyeloz, yan amiotrofik skleroz, dağınıq skleroz zamanı – 15-30 mkq intralyumbal və hər növbəti inyeksiya yeridildikdə, dozanı artırmaq (50, 100, 150, 200 mkq) lazımdır.
İntralyumbal inyeksiyaları hər 3 gündən bir yeritmək lazımdır, müalicə kursu müddətində cəmi 8-10 inyeksiya yeridilməlidir. Remissiya dövründə funikulyar miyelozun təzahürləri olmadıqda, dəstəkləyici müalicə üçün ayda 2 dəfə 100 mkq, nevroloji simptomatika olduqda – bir ay ərzində 2-4 dəfə 200-400 mkq təyin etmək lazımdır.
Sianokobalamin çatışmazlığını aradan qaldırmaq üçün əzələ daxilinə və ya vena daxilinə təyin etmək lazımdır: müalicə üçün 1-2 həftə müddətində hər gün 1 mq, dəstəkləyici doza – həftədə 1 dəfədən ayda 1 dəfəyə qədər 1-2 mq; profilaktika üçün – ayda 1 dəfə 1 mq. Müalicə müddəti fərdi olaraq müəyyən olunur.
Uşaqlar
Dəri altına 1 mkq/kq dozada təyin olunur, maksimal sutkalıq doza – 100 mkq təşkil edir. Alimentar anemiya və vaxtından əvvəl doğulmuş uşaqların anemiyası zamanı – 15 gün müddətində hər gün, gündə 30 mkq dəri altına, aplastik anemiya zamanı – klinik-hematoloji yaxşılaşma başlayana qədər 100 mkq.
Xəstəliklərdən sonra meydana çıxan distrofik vəziyyətlərdə, Daun xəstəliyində və uşaq serebral iflici zamanı – dəri altına günaşırı 15-30 mkq.
Hepatitlərdə və qaraciyər sirrozu zamanı 25-40 gün müddətində 30-60 mkq/sutkada və ya günaşırı 100 mkq.
Preparatın dozaları və istifadə rejimi patologiyadan asılıdırlar və sutkada 30-dan 100 mkq-a qədər dəyişə bilərlər. Preparatın 500 mkq/ml-də dərman formasını 3 yaşa qədər uşaqlarda istifadə etmək olmaz.

Əlavə təsirləri
Hematoloji pozğunluqlar: hiperkoaqulyasiya.
Mərkəzi sinir sistemində baş verən pozğunluqlar: nadir hallarda – oyanıqlıq vəziyyəti, baş ağrısı, başgicəllənmə.
Ürək-damar sistemində baş verən pozğunluqlar: nadir hallarda – kardialgiya, taxikardiya. Allergik reaksiyalar: nadir hallarda – övrə, səpgilər, qaşınma, anafilaktik şok, Kvinke ödemi. Yerli reaksiyalar: ağrı; nadir hallarda – inyeksiya nahiyəsində bərkimə və nekroz.
Digər əlavə təsirlər: akne, bullyoz səpgilər, ekzema, ödemlər, ürəkbulanma, tər ifrazının artması, zəiflik, qızdırma, diareya, sidiyin qırmız rəngə boyanması (vitamin B12-nin ekskresiyası hesabına), yüksək dozalarda istifadə edildikdə – hiperkoaqulyasiya, purin mübadiləsinin pozulması.
Əlavə effektlər meydana çıxdıqda, o cümlədən bu içlik vərəqədə qeyd edilməyən əlavə reaksiyalar meydana çıxdıqda, dərhal həkimə müraciət etmək lazımdır.

Doza həddinin aşılması
Sianokobalamini terapevtik dozalarda istifadə etdikdə, doza həddinin aşılması barədə məlumat verilməyib.
Doza həddi aşıldıqda, aşağıda göstərilən hallar baş verə bilər: ağciyərlərin ödemi, durğunluq, ürək çatışmazlığı, periferik damarların trombozu, övrə, nadir hallarda – anafilaktik şok.
Simptomatik müalicə təyin olunur.

Buraxılış forması
1    ml məhlul, şüşə ampulda. 10 ampul ,içlik vərəqə ilə birlikdə karton qutuya qablaşdırılır. 10 ampul, ampulları fiksasiya etmək üçün içlikdə, içlik vərəqə ilə birlikdə karton qutuya qablaşdırılır. 10 ampul polivinilxlorid örtüklü içlikdə. Ampullar yerləşdirilən 1 içlik, içlik vərəqə ilə birlikdə karton qutuya qablaşdırılır.

Saxlanma şəraiti
25° C-dən aşağı temperaturda, qaranlıqda və uşaqların əli çatmayan yerdə saxlamaq lazımdır.

Yararlılıq müddəti
2    il.
Yararlılıq müddəti bitdikdən sonra istifadə etmək olmaz.

Aptekdən buraxılma şərti
Resept əsasında buraxılır.

İstehsalçı
“Borisov Dərman Preparatları Müəssisəsi” ASC, Belarus Respublikası Minsk vilayəti, Borisov ş., Çapayev k., 64.
Tel.:/Faks: +375 (177) 735612, 731156.