pharmed

BROMGEKSIN 8MG N25 TB (GER)

BROMHEXİN 8 BERLİN-HEMİ    8 mq örtüklü tabletlər BROMHEXIN 8 BERLIN-CHEMIE

Beynəlxalq patentləşdirilməmiş adı: Bromhexine hydrochloride
Tərkibi
Təsiredici maddə:  1 tabletin tərkibində 8 mq bromheksin hidroxlorid vardır.
Köməkçi maddələr: laktoza monohidrat, qarğıdalı nişastası, jelatin, susuz kolloidal silisium dioksid, maqnezium stearat (Ph. Eur.).
Örtük:    saxaroza, kalsium karbonat, əsas yüngül maqnezium karbonat, talk, xinolin sarısı (E 104), titan dioksid (E 171), makroqol 6000, povidon K 25, duru qlükoza, karnauba mumu.

Təsviri
Hər iki tərəfi azacıq qabarıq, sarı rəngdən yaşılımtıl sarı rəngə qədər, təxminən ağ nüvəli örtüklü tabletlərdir.

Farmakoterapevtik qrupu
Öskürək və soyuqdəymə əleyhinə preparatlar, mukolitiklər.
ATC kodu: R05CB02.

Farmakoloji xüsusiyyətləri
Bromhexin 8 Berlin-Chemie preparatını tərkibində bronxosekretolitik vasitə olan bromheksin hidroxlorid var (çətin ayrılan bəlğəm ilə müşayiət olunan tənəffüs yollarının xəstəliklərində bəlğəmin durulaşdırılması üçün istifadə olunan dərman preparatı).
Farmakodinamikası
Bromheksin bitki mənşəli aktiv maddə olan vazisinin sintetik törəməsidir. Bronxial trakt səviyyəsində  sekretolitik  və  sekretomotor  təsirə  malikdir.  Heyvanlar  üzərində  aparılan tədqiqatlar göstərib ki, bu dərman bronxial sekresiyada seroz komponentin nisbətini artırır. Özlülüyün azalmasının və kirpikli epitelin aktivləşməsinin bəlğəmin hərəkətinə kömək etdiyi düşünülür.
Bromheksinin istifadəsi fonunda bəlğəmdə və bronxial sekresiyada amoksisillin, eritromisin və oksitetrasiklin antibiotiklərinin konsentrasiyasında artım müşahidə olunur. Bu təsirin klinik əhəmiyyəti aydınlaşdırılmamışdır.
Farmakokinetikası
Peroral qəbuldan sonra bromheksin demək olar ki, tamamilə sorulur, yarımxaricolma müddəti təqribən 0,4 saatdır. Plazmada maksimal konsentrasiyanın yaranma vaxtı (Tmax) – 1 saatdır. Qaraciyər vasitəsilə “ilk keçid” effekti təxminən, 80%-dir. Bu zaman bioloji aktiv metabolitlər əmələ gəlir. Plazma zülalları ilə birləşməsi 99%-dir.
Plazma konsentrasiyasının azalması çoxfazalı prosesdir. Təsir müddətinin başa çatdığı yarımxaricolma dövrü təxminən 1 saatdır. Bundan əlavə, son yarımxaricolma dövrü təxminən 16 saatdır. Bu, toxumalarda az miqdarda bromheksinin yenidən paylanması ilə əlaqədardır. Paylanma həcmi hər kq bədən çəkisi üçün təxminən 7 litr təşkil edir. Bromheksinin orqanizmdə kumulyasiya olunmur. Bromheksin plasentar baryeri keçir, həmçinin onurğa beyni mayesinə və ana südünə keçir.
Xaricolma əsasən qaraciyərdə əmələ gələn metabolitlər şəklində böyrəklər vasitəsilə həyata keçirilir. Bromheksinin zülallarla yüksək dərəcədə birləşmə və əhəmiyyətli paylanma həcmi, həmçinin toxumalardan qana yavaş-yavaş yenidən paylanması səbəbindən dərmanın hər hansı əhəmiyyətli hissəsinin dializ və ya məcburi diurezlə xaric olması ehtimalı azdır.
Ağır qaraciyər xəstəliyi zamanı ilkin maddənin klirensinin azalması ehtimalı var. Ağır böyrək çatışmazlığında bromheksinin metabolitlərinin yarımxaricolma dövrünün uzanması istisna edilmir. Fizioloji şəraitdə mədədə bromheksinin nitrozlaşması mümkündür.
İstifadəsinə göstərişlər
Bromhexin 8 Berlin-Chemie bronxların və ağciyərlərin kəskin və xroniki xəstəliklərində qatı, çətin ayrılan bəlğəmin durulaşdırılması üçün istifadə olunur.
Böyüklər və 6 yaşdan yuxarı uşaqlar üçün uyğundur.

Əks göstərişlər
Aşağıdakı hallarda Bromhexin 8 Berlin-Chemie preparatını qəbul etməyin:
Bromheksin hidroxloridə və/və ya preparatın tərkibində olan hər hansı komponentə qarşı yüksək həssaslıq. (“Tərkibi” bölməsində qeyd olunub).
Əgər körpənizi ana südü ilə qidalandırırsınızsa.

Xüsusi göstərişlər və ehtiyat tədbirləri
Bromhexin 8 Berlin-Chemie preparatını qəbul etməzdən əvvəl müalicə həkiminizlə və ya əczaçı ilə məsləhətləşin.
Bromheksin preparatının istifadəsi ilə bağlı ağır dəri reaksiyaları barədə məlumatlar qeydə alınıb. Əgər Sizdə dəri səpgiləri (ağız, boğaz, burun, gözlər, cinsiyyət orqanları kimi selikli qişaların zədələnməsi daxil olmaqla) meydana gələrsə, Bromhexin 8 Berlin-Chemie preparatının istifadəsini dayandırın və dərhal həkiminizlə əlaqə saxlayın.
Bromhexin 8 Berlin-Chemie preparatını yalnız həkiminizlə məsləhətləşdikdən sonra qəbul etməlisiniz:
Əgər Siz mədə və ya onikibarmaq bağırsağın xorasından əziyyət çəkirsinizsə və ya keçmişdə əziyyət çəkmisinizsə, Bromhexin 8 Berlin-Chemie mədə və bağırsağın selikli qişasının baryer funksiyasına təsir göstərə bilər.
Həddindən artıq ifrazat yığılması ilə müşayiət olunan bronxların bəzi nadir xəstəlikləri (məsələn, birincili siliar diskineziya) zamanı. Bu hallarda, bəlğəmin mümkün yığılması səbəbindən Bromhexin 8 Berlin-Chemie yalnız həkim nəzarəti altında istifadə edilməlidir.
Böyrək funksiyasının pozulması və ya ağır qaraciyər xəstəliyi zamanı Bromhexin 8 Berlin- Chemie daha sonra həkimin göstərişi ilə daha uzun fasilələrlə və ya azaldılmış dozalarda istifadə olunur. Böyrək funksiyasının ciddi şəkildə pozulması halında, Bromhexin 8 Berlin-Chemie preparatının parçalanma məhsullarının qaraciyərdə toplanması mümkündür.
Xüsusilə uzun müddətli müalicə zamanı qaraciyər funksiyasına vaxtaşırı nəzarət edilməlidir.
Bromhexin 8 Berlin-Chemie preparatının tərkibində laktoza, qlükoza və saxaroza vardır.
Əgər həkiminiz Sizin bəzi şəkər növlərinə qarşı dözümsüzlüyünüz olduğunu bildiribsə, bu dərmanı qəbul etməzdən əvvəl həkiminizlə əlaqə saxlayın.

Digər dərman vasitələri ilə qarşılıqlı təsiri
Əgər hər hansı digər dərman vasitəsi qəbul edirsinizsə, bu yaxınlarda qəbul etmisinizsə və ya qəbul edə bilərsinizsə, bu barədə həkiminizə və ya əczaçınıza məlumat verin.
Bromhexin 8 Berlin-Chemie öskürək əleyhinə dərmanlar ilə birlikdə istifadə edildikdə, öskürək refleksinin pozulması səbəbindən sekresiya yığılması təhlükəsi baş verə bilər və bu o deməkdir ki, bu dərmanların birgə müalicəsi ilə bağlı göstərişlər xüsusilə diqqətlə araşdırılmalıdır.
Mədə-bağırsaq traktında qıcıqlanmaya səbəb olan dərmanlar istifadə edildikdə, Bromhexin 8 Berlin-Chemie preparatının istifadəsi ilə mədənin selikli qişasının qıcıqlanmasının artması mümkündür.

Hamiləlik və laktasiya dövründə istifadəsi
Hamiləlik və laktasiya dövründə, həmçinin ehtimal edilən və ya planlaşdırılan hamiləlik zamanı, bu preparatı qəbul etməzdən əvvəl məsləhət üçün həkimə və ya əczaçıya müraciət edin.
İndiyə qədər bu dərmanın hamilə insanlarda istifadəsi ilə bağlı təcrübə yoxdur, buna görə də Bromhexin 8 Berlin-Chemie hamiləlik dövründə yalnız həkim tərəfindən ciddi fayda/risk qiymətləndirməsindən sonra qəbul edilməlidir və hamiləliyin ilk üç ayında tövsiyə edilmir.
Bromheksin ana südünə keçir. Buna görə də, Bromhexin 8 Berlin-Chemie ana südü ilə qidalandırma zamanı qəbul edilməməlidir.

Uşaqlarda və yeniyetmələrdə istifadəsi
6 yaşdan kiçik uşaqlarda aktiv maddənin yüksək konsentrasiyası səbəbindən Bromhexine 8 Berlin-Chemie dərmanı tövsiyə edilmir.

Nəqliyyat vasitəsini və digər potensial təhlükəli mexanizmləri idarəetmə qabiliyyətinə təsiri

Bromhexin 8 Berlin-Chemie nəqliyyat vasitələrini və mexanizmləri idarə etmək qabiliyyətinə heç bir təsir göstərmir və ya cüzi təsir göstərir.

İstifadə qaydası və dozası
Hər zaman bu preparatı müalicə həkiminin və ya əczaçının tövsiyələrinə müvafiq dəqiqliklə qəbul edin. Əgər Sizdə şübhələr olarsa, müalicə həkimi və ya əczaçı ilə məsləhətləşin.
Dozalanması
Tövsiyə olunan doza aşağıdakı cədvəldə ətraflı təsvir edilmişdir.

6 yaşdan kiçik uşaqlar üçün daha az aktiv maddənin olduğu doza olan buraxılış forması istehsal olunur.
Bu dərman böyrək funksiyasının pozulması və ya ağır qaraciyər xəstəliyi halında daha uzun fasilələrlə və ya azaldılmış dozada istifadə edilməlidir. Bu barədə həkiminizdən soruşun.
İstifadə qaydası
Örtüklü tabletlər bol maye ilə qəbul edildikdən sonra çeynəmədən qəbul edilməlidir.
Qeyd
Bu dərman vasitəsi bol su ilə peroral qəbul edilir.
Müalicə müddəti xəstəliyin etiologiyasından və kəskinliyindən asılı olaraq həkim tərəfindən müəyyən edilir.
Simptomlarınız 4-5 gündən sonra pisləşərsə və ya yaxşılaşmazsa, həkimə müraciət etməlisiniz. Bromhexin 8 Berlin-Chemie preparatının təsirinin çox güclü və ya çox zəif olduğunu düşünürsünüzsə, həkiminiz və ya əczaçınıza müraciət edin.
 
Buraxılan dozanın kompensasiyası üçün ikiqat doza qəbul etməyin.
Əgər Siz dozanı qəbul etməyi unutmusunuzsa və ya dərmanı təyin olunduğundan daha aşağı dozada qəbul etmisinizsə, növbəti dəfə onu təyin olunmuş dozada qəbul edin.
Bromhexine    8    Berlin-Chemie    preparatı    ilə    müalicə    həkiminizlə    məsləhətləşmədən dayandırılmamalıdır. Bu, xəstəliyinizi daha da ağırlaşdıra bilər.
Bu preparatın istifadəsi ilə bağlı hər hansı sualınız varsa, həkiminizə və ya əczaçıya müraciət edin.

Əlavə təsirləri
Bütün dərmanlar kimi, Bromhexin 8 Berlin-Chemie preparatı əlavə təsirlərə səbəb ola bilər, lakin, bunlar hamıda müşahidə olunmur.
Aşağıda qeyd olunan əlavə təsirlərdən birinə məruz qalmısınızsa Bromhexin 8 Berlin-Chemie preparatını qəbul etməyin və mümkünsə dərhal həkiminizə müraciət edin.
Bəzən (100 adamdan 1-də müşahidə oluna bilər)
Qızdırma
Ürəkbulanma, qarın ağrısı, qusma, ishal
Nadir (1000 adamdan 1-də müşahidə oluna bilər)
Yüksək həssaslıq reaksiyaları (məsələn, respirator distress) Səpgi, övrə
Naməlum (mövcud məlumatlara əsasən tezliyi təxmin etmək mümkün deyil)
Anafilaktik reaksiyalar, o cümlədən anafilaktik şok, angionevrotik ödem (dəri, dərialtı, selikli qişa və ya submukoz toxumaların sürətlə şişməsi) və qaşınma, bronxospazm
Kəskin dəri reaksiyaları (o cümlədən çoxformalı eritema, Stivens-Conson sindromu/toksik epidermal nekroliz və kəskin generalizə olunmuş ekzantematoz pustulyoz)
Yüksək həssaslıq reaksiyasının ilk əlamətlərində və ya dəri və selikli qişada qeyri-adi dəyişikliklər baş verdikdə, Bromhexin 8 Berlin-Chemie qəbulunu dayandırın və dərhal həkimə müraciət edin.
Əlavə təsirlər barədə məlumat verilməsi
Sizdə hər hansı əlavə təsirlər meydana çıxdığı zaman müalicə həkiminə, əczaçıya və ya tibb bacısına müraciət edin. Bunlara, həmçinin bu içlik vərəqəsində təsvir edilməmiş hər hansı mümkün əlavə təsirlər də daxildir.
Əlavə təsirlər barədə bilavasitə olaraq Azərbaycan Respublikası Səhiyyə Nazirliyinin Analitik Ekspertiza Mərkəzinin Dərmanların keyfiyyətinə nəzarət (İnspeksiya) şöbəsinə (+99412) 596- 07-12 telefon nömrəsi və pv@pharma.az elektron poçtu vasitəsilə məlumat verə bilərsiniz.
Əlavə təsirlər barədə məlumat verməklə Siz, bu dərman preparatının təhlükəsizliyi barədə daha çox məlumat toplamağa kömək edə bilərsiniz.

Doza həddinin aşılması
Doza həddinin aşılması əlamətləri, bir qayda olaraq, bu dərmanın təsvir olunan əlavə təsirlərindən kənara çıxmır. Bu pozğunluqların ağır təzahürlərində qan dövranının vəziyyətinin monitorinqi və zəruri hallarda bu təzahürlərə uyğun müalicə tələb oluna bilər.
Əgər uşaq böyük miqdarda Bromhexin 8 Berlin-Chemie dərmanı udubsa, zəhmət olmasa, ən yaxın həkimə müraciət edin.

Buraxılış forması
20 və ya 25 tablet blisterdə. 1 və ya 2 blister içlik vərəqə ilə birlikdə karton qutuda qablaşdırılır. Preparatın bütün buraxılış formaları satışda olmaya bilər.

Saxlanma şəraiti
25°C-dən yuxarı olmayan temperaturda saxlayın. Uşaqların əli çatmayan yerdə saxlanmalıdır.
Heç bir dərman vasitəsini kanalizasiyaya və ya məişət tullantılarına tullamayın. Lazımsız dərman vasitəsinin utilizasiyası barədə əczaçı ilə məsləhətləşin. Bu tədbirlər ətraf mühiti qorumağa kömək edir.

Yararlılıq müddəti
3 il.
Yararlılıq müddəti bitdikdən sonra istifadə etmək olmaz.

Aptekdən buraxılma şərti
Reseptsiz buraxılır.

İstehsalçı
BERLIN-CHEMIE AG.
Glienicker Weg 125
12489 Berlin, Almaniya.

Qeydiyyat Vəsiqəsinin Sahibi və İstehsalçı
BERLIN-CHEMIE AG.
Glienicker Weg 125
12489 Berlin, Almaniya.