Pharmed
BETADIN 100MG 30ML MEHLUL
TƏSDİQ EDİLMİŞDİR
Azərbaycan Respublikası
Səhiyyə Nazirliyi
Farmakoloji və Farmakopeya
Ekspert Şurasının sədri
_____________ E.M.Ağayev
___________________ 2023-cü il
Dərman vasitəsinin istifadəsi üzrə təlimat (xəstələr üçün)
BETADİN® 100 mq/ml xaricə istifadə üçün dezinfeksiyaedici məhlul
BETADINE®
Beynəlxalq patentləşdirilməmiş adı: Povidone-iodine
Tərkibi
Təsiredici maddə: 1 ml məhlulun tərkibində 10 mq aktiv yoda ekvivalent 100 mq povidon-yod
vardır.
Köməkçi maddələr:qliserin, nonoksinol 9, susuz limon turşusu, susuz dinatrium hidrofosfat,
təmizlənmiş su, natrium hidroksid.
Təsviri
Tünd qəhvəyi rəngli, yod qoxulu, asılı və ya çöküntü hiccəcikləri olmayan məhluldur.
Farmakoterapevtik qrupu
Antiseptiklər və dezinfeksiyaedici preparatlar; yod preparatları, povidon-yod.
ATC kodu: D08AG02.
Farmakoloji xüsusiyyətləri
Farmakodinamikası
Təsir mexanizmi
Povidon-yod elementar yod (I2 təsiredici maddə) ilə polivinilpirolidonun sintetik polimerinin
(povidon) kompleksidir, hansı ki yodun kompleksdən daimi sərbəst buraxılması üçün depo rolunu
oynayır (polivinilpirolidonun öz antibakterial aktivliyi yoxdur) və həmçinin yodun hüceyrə
membranları ilə daha asan təmasını asanlaşdırır. Dərinin və ya selikli qişaların səthinə istifadə
edildikdən sonra bu kompleksdən bir müddət ərzində yod ayrılır. Elementar yod (I2) yüksək effektiv
mikrobisid maddədir, polimer isə yod üçün depo rolunu oynayır. Yodun tədricən sərbəst
buraxılması elementar yodun olması ilə bağlı çatışmazlıqları kompensasiya edir və onun yüksək
effektiv mikrobisid effektivliyini dəstəkləyir. Sərbəst yod sürətlə mikroorqanizmlərə nüfuz edir və
zülalların, amin turşularının, nukleotidlərin və doymamış yağ turşularının əsas qruplarına təsir edir.
Mikroorqanizmlərin fermentlərində və struktur zülallarında olan amin turşularının tiol, sulfhidril və
hidroksil qrupları ilə reaksiyaya girir və bununla da onları oksidləşdirir.
Farmakodinamik təsirləri
Povidon-yod sürətlə antibakterial (qram-müsbət və qram-mənfi bakteriyalar daxil olmaqla), göbələk
əleyhinə və virusid (örtüklü və örtüksüz viruslar) təsi göstərir. Xəstəxanada, stomatoloji və tibbi
praktikada 60 ildən artıq intensiv istifadə müddətində povidon-yoda qarşı rezistentlik müşahidə
edilməmişdir. Bundan əlavə, antibiotik rezistentliyi povidon-yoda qarşı həssaslığa təsir göstərmir.
Farmakokinetikası
Povidon-yodun farmakokinetikasına povidonun və yodun dissosiasiyası və sonradan orqanizmdə
yodidə çevrilməsi təsir göstərir. Müxtəlif dərman formaları və müxtəlif istifadə yolları povidon-
yodun sorulmasına təsir göstərə bilər və sistem absorbsiya dərəcəsi onun istifadə yerindən və şərtlərindən (sahə, sağlam dərinin səthi, zədələnmiş dərinin səthi, selikli qişalar, yaralar, bədən
boşluqları) asılıdır.
Sorulması
İn vivo tədqiqatların nəticələri göstərir ki, yod dəri vasitəsilə sorula bilir və sorulma dərəcəsi dərinin
vəziyyətindən (məsələn, zədələnmiş və ya sağlam dəri), həmçinin yodun istifadə müddətindən və
səthindən asılıdır. Məhdud miqdarda yod zədələnməmiş dəridən sorulur.
Yodun əhəmiyyətli dərəcədə sorulması ilə xarakterizə olunan zədələnmiş dəridə, xoralarda, selikli
qişalarda (uşaqlıq yolu) və ya bütöv dərinin böyük səthlərinə istifadə edildikdə yodun
absorbsiyasının yüksəlməsi baş verir.
Sistem qan dövranında yalnız az miqdarda povidon (~35 kDa) aşkar edilir.
Paylanması
İstifadə yolundan asılı olmayaraq, sorulmuş yod/yodid qan dövranı sistemi ilə bütün orqanizmə
paylanır. Onun bir hissəsi (təxminən 30%) hormonal sintez zamanı qalxanabənzər vəz tərəfindən
xaric edilir. 24 saatdan sonra yod həmçinin qaraciyər, qan və qalxanabənzər vəz də daxil olmaqla
müxtəlif orqanlara (əhəmiyyətsiz dərəcədə) paylanır. Yod plasentar baryerdən keçir və ana südü ilə
xaric olunur (“Hamiləlik və laktasiya dövründə istifadəsi” bölməsinə baxın).
Yerli, peroral və ya vaginal tətbiqdən sonra povidon əhəmiyyətsiz dərəcədə sorulur və
hematoensefalik baryerə və plasentaya nüfuz etmir.
Biotransformasiyası
Yod yodidə qədər bərpa olunur və qan dövranından natrium yodid simporterin (NIS) təsiri altında
qalxanabənzər vəzin follikulyar hüceyrələrində konsentrasiya olunur. Tireotrop hormon (TSH)
yodun qandan qalxanabənzər vəzinin hüceyrələrinə daşınmasını, yodidin yoda qədər oksidləşməsini
və yodun tirozinə bağlanmasını stimullaşdırır.
Povidonun metabolizmi minimaldır (<0,3%).
Xaric olması
Yod, qalxanabənzər vəzidə sorulmadıqda, əsasən böyrəklər tərəfindən xaric olunur. Yodun böyrək
klirensi (Cl) 872,4 ± 119,3 ml/saat, xaricolma sürəti konstantası (k) 0,0996 ± 0,009/saat və
yarımxaricolma dövrü 6,22 saat təşkil edir.
Povidon əsasən böyrəklər və az miqdarda ödlə xaric olunur.
Klinikayaqədərki təhlükəsizlik məlumatları
Yod qalxanabənzər vəzinin hormonlarının sintezi üçün zəruri olan əsas elementdir və bu səbəbdən
enerji mübadiləsində və bir çox digər fizioloji proseslərdə mühüm rol oynayır. Yod dəniz balığı,
dəniz yosunu, süd məhsulları, yumurta, quş əti və ət kimi qidalar vasitəsilə orqanizmə daxil olur.
Siçanlar, siçovullar və dəniz donuzcuğu üçün peroral LD50 40-100 q/kq, siçanlar üçün peritondaxili
LD50 12-15/kq (povidonun orta molekulyar çəkisi 10-30 kDa) təşkil edir.
Povidon-yod ilə kəskin, subxroniki və xroniki toksiklik tədqiqatları nisbətən yüksək dozalarda
sistem istifadəsindən sonra toksiklik göstərmişdir, bu səbəbdən toksiklik klinik cəhətdən
əhəmiyyətli deyil.
Genotoksiklik
Bir neçə in vitro genotoksiklik tədqiqatında povidon-yodun mutagenliyi ehtimal olunmuşdur, lakin
in vivo tədqiqatlar daxil olmaqla digər tədqiqatlar mənfi nəticələr göstərmişdir. In vitro test
sistemlərində povidon-yodun toksikliyini nəzərə alaraq, çoxlu sübutlar göstərir ki, povidon-yod
genotoksik deyil. Povidon-yodun kanserogen potensialını qiymətləndirmək üçün uzunmüddətli
heyvan tədqiqatları aparılmamışdır.
Reproduktiv və ontogenetik toksikiliyi
Dovşanlarda ontogenetik toksiklik tədqiqatları göstərdi ki, aşağı molekulyar çəkili povidon-yod
kompleksi (16 - 75 q/kq/gün) ananın çəki artımının dozadan asılı azalmasına səbəb olub və
embrionun və plasentanın orta çəkisi nəzarət heyvanlarında olandan daha aşağı olmuşdur.
Siçanlarda povidon-yodun vaginal dəliyə istifadəsi zamanı embriotoksiklik nümayiş etdirilmişdir.
Yodun plasentadan keçmə qabiliyyətinə və dölün yodun farmakoloji dozalarına qarşı həssaslığına
görə, povidon-yod hamilə qadınlarda yalnız hərtərəfli tibbi müayinədən sonra istifadə edilməlidir.
İstifadəsinə göstərişlər
İnyeksiyadan, qan almazdan və digər punksiyalardan, biopsiyadan, qan köçürülməsindən, infuzion
terapiyadan əvvəl dərinin dezinfeksiyası.
Dərinin və selikli qişaların antiseptik işlənməsi, məsələn, cərrahi əməliyyatdan əvvəl. Yaraların aseptik işlənməsi.
Dərinin bakterial və göbələk infeksiyası.
Əməliyyatdan əvvəl dərinin tam və ya qismən dezinfeksiyası (pasiyentin əməliyyatdan əvvəl
“dezinfeksiyaedici çimmə” adlanan dezinfeksiya hazırlığı).
Əks göstərişlər
Preparatın istənilən komponentinə qarşı yüksək həssaslıq.
Qalxanabənzər vəzin funksiyasının pozulması.
Radioyodun yeridilməsindən əvvəl, sonra və yeridilən zaman.
Herpetiformalı Dürinq dermatiti.
Dərinin zədələnməsinə səbəb olan maddələrin yaranması nəticəsində tərkibində civə olan
preparatlarla eyni vaxtda istifadəsi.
1 yaşa qədər uşaqlar.
Xüsusi göstərişlər və ehtiyat tədbirləri
Preparatı hamilə və laktasiya dövründə olan pasiyentlərdə istifadəsi zamanı xüsusilə ehtiyat
tədbirlərinə riayət etmək lazımdır. Belə hallarda fayda/risk qiymətləndirilməsi vacibdir və povidon-
yod yalnız zəruri hallarda istifadə edilməlidir (“Hamiləlik və laktasiya dövründə istifadəsi”
bölməsinə baxın).
Pasiyentin əməliyyatdan əvvəl hazırlanması zamanı pasiyentin altında artıq məhlulun
yığılmamasına diqqət yetirilməlidir. Məhlul ilə uzun müddət təmasda olmaq dərinin qıcıqlanmasına
və nadir hallarda ciddi dəri reaksiyalarına səbəb ola bilər. Pasiyentin altında məhlulun yığılması
kimyəvi yanığa səbəb ola bilər.
Dərinin qıcıqlanması, kontakt dermatit və ya hiperhəssaslıq hallarında preparatın istifadəsini
dayandırmaq lazımdır.
İstifadə etməzdən əvvəl məhlulu qızdırmaq olmaz.
Preparatı uşaqların əli çatmayan yerdə saxlamaq lazımdır.
Povidon-yod, preparatın öz rəngi səbəbindən tətbiq yerində dərinin rənginin müvəqqəti dəyişməsinə
səbəb ola bilər.
Məhlulun orofaringeal istifadəsi zamanı, povidon-yodun tənəffüs yollarına düşməsindən qaçınmaq
lazımdır, çünki bu pnevmonitə səbəb ola bilər. Bu, xüsusilə intubasiya olunmuş pasiyentlər üçün
vacibdir.
Uşaqlar və yeniyetmələr
Betadin məhlulu 1-2 yaşlı uşaqlar üçün tövsiyə edilmir (“İstifadə qaydası və dozası” bölməsinə
baxın) və onun istifadəsi yenidoğulmuşlarda və 1 yaşa qədər uşaqlarda əks göstərişdir (“Əks
göstərişlər” bölməsinə baxın).
Məhlulun tünd qəhvəyi rəngi onun effektivliyini göstərir. Məhlulun rəngsizləşməsi onun antimikrob
xüsusiyyətlərinin pisləşməsini göstərir. Məhlulun deqradasiyası işıqda və 40оС-dən yuxarı
temperaturda baş verir.
Preparatın gözlərə düşməsindən qaçınmaq lazımdır.
Digər dərman vasitələri ilə qarşılıqlı təsiri
Povidon-yod kompleksi pH 2,0-7,0 intervalında effektivdir. Preparat zülallar və digər doymamış
üzvi maddələrlə reaksiyaya girə bilər ki, bu da onun effektivliyinin azalmasına səbəb olur.
Yaraların işlənməsi üçün PVP-yodun və ferment preparatlarının birgə istifadəsi qarşılıqlı şəkildə
effektivliyi azaldır.
Tərkibində civə (“Əks göstərişlər” bölməsinə baxın), gümüş, hidrogen peroksid və taurolidin olan
preparatların povidon-yod ilə qarşılıqlı təsiri nəticəsində onların effektivliyinin qarşılıqlı azalması
baş verə bilər və bu səbəbdən bu preparatlar eyni vaxtda istifadə edilməməlidir.
PVP-yod kompleksi bərpaedici maddələrlə, tərkibində qələvi metalların duzları olan və turşularla
reaksiyaya girə bilən maddələrlə uyuşmur.
Dərinin həmin və ya yaxın nahiyələrində PVP-yodun tərkibində oktenidin olan antiseptiklərlə birgə
və ya dərhal sonra istifadəsi işlənmiş səthdə tünd ləkələrin əmələ gəlməsinə səbəb ola bilər.
Povidon-yodun oksidləşdirici effekti müxtəlif diaqnostik testlərin yanlış-müsbət nəticələrinə səbəb
ola bilər (məsələn, nəcisdə və sidikdə hemoqlobinin təyini, eləcədə toluidin və adan zifti istifadəsi
ilə sidikdə qlükozanın təyini). Tərkibində litium olan preparatlarla müalicə alan pasiyentlərdə povidon-yodun uzunmüddətli,
xüsusən də böyük səthlərdə istifadəsindən çəkinmək lazımdır.
Povidon-yod məhlulundan yodun sorulması qalxanabənzər vəzinin funksional testlərinin
nəticələrini dəyişdirə bilər.
PVP-yodun istifadəsi yodun qalxanabənzər vəzi tərəfindən mənimsənilməsini azalda bilər, bu da
bəzi tədqiqatların və prosedurların nəticələrinə təsir göstərə bilər (qalxanabənzər vəzin
ssintiqrafiyasına, zülalla bağlı yodun ölçülməsinə, radioaktiv yodun istifadəsi ilə diaqnostik
prosedurlara), bununla əlaqədar qalxanabənzər vəzi xəstəliklərinin yod preparatları ilə müalicəsinin
planlaşdırılması mümkün olmaya bilər. PVP-yodun istifadəsi dayandırdıqdan sonra növbəti
ssintiqrafiyaya qədər ən azı 4 həftə gözlənilməlidir (“Əks göstərişlər” bölməsinə baxın).
Uyuşmazlığı
Povidon-yod həll edilmiş maddələrlə, qələvi metalların duzları, salisil turşusu, hidrogen peroksid,
taurolidin, aşı maddələri, gümüş və civə duzları ilə uyuşmur.
Hamiləlik və laktasiya dövründə istifadəsi
Povidon-yod plasentadan keçir və ana südü ilə xaric olur.
Anaları yod terapiyası alan uşaqlarda anadangəlmə hipotireoz daxil olmaqla, qalxanabənzər vəzin
funksiyasının pozulması barədə məlumat verilmişdir.
Hamiləlik və laktasiya dövründə ana üçün potensial fayda dölə və ya yenidoğulmuşa olan riskdən
üstün olduğu hallar və ya daha təhlükəsiz alternativ müalicə üsulu olmadığı hallar istisna olmaqla,
povidon-yodun istifadəsindən çəkinmək lazımdır.
Fertillik
Povidon-yodun insanda fertilliyə təsiri barədə məlumat məhduddur.
Nəqliyyat vasitəsini və digər potensial təhlükəli mexanizmləri idarəetmə qabiliyyətinə təsiri
Betadin® nəqliyyat vasitələrini idarə etmək və mexanizmlərlə işləmək qabiliyyətinə təsir etmir.
İstifadə qaydası və dozası
Dozalanma rejimi
Betadin® məhlulu dezinfeksiyaedici nahiyədən asılı olaraq durulaşdırılmamış şəkildə və ya su ilə
10% (1:10) və ya 1% (1:100) nisbətində durulaşdırıldıqdan sonra istifadə edilə bilər.
Durulaşdırılmamış preparat inyeksiyadan, punksiyadan, qanın götürülməsindən, biopsiyadan, qan
köçürülməsindən, infuzion terapiyadan və ya zədələnməmiş dərinin üzərində aparılan hər hansı
digər cərrahi müdaxilələrdən əvvəl dəridə 1-2 dəqiqə ərzində qalmalıdır.
Yaraların, yanıqların işlənməsi üçün, selikli qişaların dezinfeksiyası üçün, dərinin bakterial və
göbələk infeksiyalarında 10%-li məhlul istifadə edilə bilər (Betadin® məhlulunu su ilə 1:10
nisbətində durulaşdırıb).
Əməliyyatönü dezinfeksiyaedici vannalar üçün 1%-li Betadin® məhlulu istifadə edilir (1:100).
Bədənin bütün səthi bərabər şəkildə 1%-li məhlul ilə işlənilməlidir və 2 dəqiqəlik ekspozisiyadan
sonra məhlul ilıq su ilə yuyulmalıdır. Betadin® məhlulu birbaşa istifadədən öncə
durulaşdırılmalıdır. Hazırlanmış məhlulu saxlamaq olmaz.
Betadin® məhlulunun ləkələri ilıq su ilə asanlıqla gedir. Çətin gedən ləkələr natrium tiosulfat
məhlulu ilə işlənməlidir.
Əməliyyatönü dəri dezinfeksiyası zamanı pasiyentin altında artıq məhlulun yığılmamasına diqqət
yetirilməlidir. Məhlul ilə uzun müddət təmasda olmaq dərinin qıcıqlanmasına və nadir hallarda
ciddi dəri reaksiyalarına səbəb ola bilər. Məhlulun pasiyentin altında yığılması dərinin kimyəvi
yanmasına səbəb ola bilər (“Xüsusi göstərişlər və ehtiyat tədbirləri” bölməsinə baxın).
Uşaqlar və yeniyetmələr
1 yaşdan 2 yaşa qədər olan uşaqlarda Betadin® məhlulunun istifadəsi tövsiyə edilmir.
Yenidoğulmuşlarda və 1 yaşa qədər uşaqlarda preparat əks göstərişdir (“Əks göstərişlər” bölməsinə
baxın).
İstifadə qaydası
Betadin® məhlulu durulaşdırılmış və durulaşdırılmamış şəkildə yalnız xaricə istifadə üçün nəzərdə
tutulub.
Betadin® məhlulunu isti su ilə qarışdırmaq olmaz. Məhlul tez bir zamanda bədən temperaturuna
qədər isidilə bilər.Betadin® məhlulu istifadədən dərhal əvvəl durulaşdırılmalıdır və mümkün qədər tez istifadə
edilməlidir.
Əlavə təsirləri
Əlavə təsirlərin tezliyi aşağıdakı parametrlərlə təyin edilir: çox tez-tez (≥ 1/10); tez-tez (≥ 1/100 - <
1/10); bəzən (≥ 1/1000 - < 1/100); nadir hallarda (≥ 1/10000 - < 1/1000); çox nadir hallarda (<
1/10000); məlum deyil (əldə olan məlumatlar görə tezliyi qiymətləndirmək mümkün deyil).
İmmun sistemdə baş verən pozuntular: nadir hallarda – yüksək həssaslıq; çox nadir hallarda –
anafilaktik reaksiyalar.
Endokrin sistemdə baş verən pozuntular: çox nadir hallarda – hipertireoz* (bəzən taxikardiya və
narahatlıq kimi simptomlarla müşayiət edilən); məlum deyil – hipotireoz****.
Maddələr mübadiləsində və qidalanmada baş verən pozuntular: məlum deyil – elektrolit balansın
pozulması **, metabolik asidoz **.
Tənəffüs sistemində, döş qəfəsi və divararalığı orqanlarında baş verən pozuntular: məlum deyil –
pnevmonit*****.
Dəridə və dərialtı toxumada baş verən pozuntular: nadir hallarda – kontakt dermatit (eritema,
dəridə kiçik qabarcıqlarla, qaşınma kimi simptomlarla); çox nadir hallarda – angionevrotik ödem.
Böyrəklərdə və sidikçıxarıcı yollarda baş verən pozuntular: məlum deyil – kəskin böyrək
çatışmazlığı**, qanın osmolyarlığının dəyişməsi**.
Travmalar, intoksikasiyalar və manipulyasiyada ağırlaşma: məlum deyil – dərinin kimyəvi
yanığı***.
*Qalxanabənzər vəzin xəstəlikləri olan pasiyentlərdə anamnezdə povidon-yodun əhəmiyyətli
dərəcədə istifadəsindən sonra (məsələn, povidon-yod məhlulunun yaraların işlənməsi və dərinin
böyük səthində uzun müddət istifadəsindən sonra).
**Povidon-yodun əhəmiyyətli dərəcədə istifadəsindən sonra yarana bilər (məsələn, yanıqların
müalicəsi zamanı).
***Əməliyyata hazırlanan zamanı həddindən artıq məhlulun toplanması nəticəsində inkişaf edə
bilər.
****Povidon-yodun böyük miqdarının istifadəsindən və ya uzun müddət istifadəsindən sonra
hipertireoz.
*****Aspirasiya ilə əlaqədar ağırlaşma.
Əlavə təsirlər barədə məlumatın verilməsi
Preparatın şübhəli əlavə təsirləri barədə məlumatın verilməsi çox vacibdir, bu dərman vasitəsinin
risk/fayda nisbətinin fasiləsiz monitorinqinin aparılmasına imkan verir. Tibb işçiləri istənilən əlavə
təsir barədə milli sistem vasitəsilə məlumat verməlidirlər.
Doza həddinin aşılması
Antiseptik preparatlar yerli xarici istifadə üçün nəzərdə tutulub.
Doza həddinin aşılmasının simptomları
Kəskin yod intoksikasiyasının simptomları: mədə-bağırsaq traktının pozğunluqları, anuriya, damar
kollapsı, ağciyər ödemi, metabolizm pozğunluqları.
Sistem toksiklik böyrək çatışmazlığına (anuriya daxil olmaqla), taxikardiya, hipotenziya, damar
çatışmazlığı, asfiksiyaya səbəb olan səs yarığının ödemi, ağciyər ödemi, qıcolmalar, qızdırma və
metabolik asidoza səbəb ola bilər.
Hipertireoz və ya hipotireoz da inkişaf edə bilər.
Qalxanabənzər vəzinin funksiyası pozulduqda, povidon-yodla müalicə dayandırılmalıdır.
Doza həddinin aşılmasının müalicəsi
Simptomatik və dəstəkləyici terapiya aparılır.
Ağır hipotenziya zamanı venadaxili maye yeridilməlidir; zəruri hallarda vazopressorlar əlavə
edilməlidir.
Yuxarı tənəffüs yollarının zədələnməsi əhəmiyyətli ödem və şişkinliyə səbəb olduqda, endotraxeal
intubasiya tələb oluna bilər.
Məcburi qusma yaradılmamalıdır. Pasiyent elə bir vəziyyətdə olmalıdır ki, tənəffüs yolları sərbəst
olsun və aspirasiyadan qorunsun (qusma zamanı).Pasiyentdə qusma olmadıqda və ağızdan qida qəbul edə bildikdə, nişastalı qidaların (məsələn,
kartof, un, nişasta, çörək) qəbulu yodun daha az zəhərli yodidə çevrilməsinə kömək edə bilər.
Bağırsağın perforasiyasının əlamətləri olmadıqda, nazoqastral zond vasitəsilə nişasta məhlulu ilə
mədə yuyula bilər (mədə axıntısı tünd göy-bənövşəyi rəngdə olacaq və bu rəng yuyulmanın nə vaxt
dayandırılacağını müəyyənləşdirmək üçün istifadə edilə bilər).
Hemodializ yodu effektiv şəkildə xaric edir və ağır yod zəhərlənməsi hallarında, xüsusən də böyrək
çatışmazlığında istifadə edilməlidir. Davamlı veno-venoz hemofiltrasiya hemodializdən daha az
effektivdir.
Qalxanabənzər vəzin funksiyası pozulduqda, povidon-yodla müalicə dayandırılmalıdır.
Buraxılış forması
30 ml, 120 ml və ya 1000 ml məhlul damcısalanı olan yaşıl rəngli polietilen flakonda. 30 ml və 120
ml həcmi olan flakonlar içlik vərəqə ilə birlikdə karton qutuya qablaşdırılır.
Saxlanma şəraiti
25ºС temperaturdan yüksək olmayan, işıqdan qorunan və uşaqların əli çatmayan yerdə saxlamaq
lazımdır.
Utilizasiyası və istifadəsizamanı ehtiyat tədbirləri
Preparatın istifadə edilməyən və ya qalığının istənilən miqdarı yerli tələblərə uyğun utilizasiya
edilir.
Yararlılıq müddəti
3 il.
Yararlılq müddəti qeyd edilən ayın son gününə şamil edilir.
Yararlılıq müddəti bitdikdən sonra istifadə etmək olmaz.
Aptekdən buraxılma şərti
Reseptsiz buraxılır.
İstehsalçı
Egis Pharmaceuticals PLC, Hungary.
9900 Kermend, Matyas kiraly u. 65, Hungary.
Qeydiyyat vəsiqəsinin sahibi
Egis Pharmaceuticals PLC, Hungary.
1106 Budapest, Kereszturi ut 30-38, Hungary.