Grindex
ALMAGEL A 170ML SRP
ALMAGEL® A daxilə qəbul edilən suspenziya ALMAGEL A
Tərkibi
Təsiredici maddlər: 5 ml (1 ölçü qaşığı) suspenziyanın tərkibində 2,18 q alüminium hidroksid geli (218 mq alüminium oksidə müvafiq), 350 mq maqnezium hidroksid pastası (75 mq maqnezium oksidə müvafiq), 109 mq benzokain vardır.
Köməkçi maddələr: hidrogen peroksid məhlulu, sorbitol, hidroksietilsellüloza, metilparahidroksibenzoat, propilparahidroksibenzoat, butilparahidroksi-
benzoat, natrium saxarin, propilenqlikol, makroqol 4000, limon yağı, etil spirti, təmizlənmiş su.
Təsviri
Ağ və ya demək olar ki, ağ rəngli suspenziyadır.
Farmakoterapevtik qrupu
Antasid maddə.
ATC kodu: А02АВ10.
Farmakoloji xüsusiyyətləri
Almagel A mədə şirəsinin yüksəlmiş turşuluğunu aşağı salan və bir sıra mədə-bağırsaq xəstəliklərində ağrıkəsici təsir göstərən preparatdır. Preparat tərkibcə alüminium və maqnezium hidroksidlərinin suda həll olmayan, mədə-bağırsaq sistemindən demək olar ki, sorulmayan balanslaşdırılmış gelidir. Preparatın tərkibində olan benzokain (anestezin) yerli anesteziyaedici (ağrıkəsici) vasitədir. Almagel A mədənin selikli qişasına yerli təsir göstərir və mədəni qidanın, xlorid turşusunun və digər zərərli maddələrin qıcıqlandırıcı təsirlərindən qoruyur; pepsinin fəallığını zəiflədir. Qida borusunun yüksəlmiş turşuluğunu aşağı salır. Benzokain ağrı hissini zəiflədir və aradan qaldırır, qida borusunun, mədənin və onikibarmaq bağırsağın selikli qişasına sitoprotektiv və iltihab əleyhinə təsir göstərir. Köməkçi maddələrdən sorbitol zəif qazqovucu, mülayim ödqovucu və işlədici təsirlərə malikdir.
İstifadəsinə göstərişlər
Ağrı hissi, ürəkbulanma və qusma ilə müşayiət olunan iltihabi və eroziv dəyişikliklərin qısa simptomatik müalicəsi;
qida borusu, mədə və onikibarmaq bağırsağın selikli qişasında kəskin və ya xroniki iltihab və ya hər hansı bir digər patologiya.
Əks göstərişlər
preparatın hər hansı komponentinə qarşı yüksək həssaslıq;
böyrək çatışmazlığının ağır formaları – hipermaqneziemiya və alüminium intoksikasiyası riski artır;
uşaqlıq dövrü – methemoqlobinemiya riski olduğu üçün;
hamiləlik və laktasiya dövrü.
Xüsusi göstərişlər və ehtiyat tədbirləri
Almagel A aşağıdakı hallarda ehtiyatla təyin olunur:
- ağır adətolunmuş qəbizlik, qarın nahiyəsində etiologiyası məlum olmayan ağrı, kəskin appendisitə şübhə, xoralı kolit, divertikulyoz, kolostomiya və ya ileostomiya (su-duz balansının pozulması riski artır), xroniki ishal, babasilin kəskin dövrü;
- orqanizmin turşu-qələvi müvazinətinin pozulması, metabolik alkaloz zamanı;
- qaraciyər sirrozu və digər qaraciyər xəstəlikləri;
- ürək çatışmazlığının ağır formaları, durğunluq ürək çatışmazlığı;
- hamiləlik toksikozu;
- böyrək xəstəlikləri (hipermaqneziemiya və alüminium intoksikasiyası riski artır);
- epilepsiyanın bütün növləri.
Alüminium sinir toxumasında toplandığına görə alüminium tərkibli antasid maddələrin yaşlı adamlara və Alzheymer xəstəliyindən əziyyət çəkən xəstələrə təyin olunması
məhdudlaşdırılmalıdır. Yaşlı adamlar Almagel A qəbul etdikdə anamnezdə olan sümük və oynaq xəstəlikləri kəskinləşə bilər.
Almagel A qəbulu zamanı ağızın və dilin selikli qişasında keçici keyləşmə baş verir.
Preparatın tərkibində olan parahidroksibenzoatlar allergik reaksiyalar (əsasən ləng gedişli) və nadir hallarda bronxospazm törədə bilər.
Almagel A-nın tərkibində 2,5% etanol (spirt) var, yəni preparatın 5 ml-də 98,1 q etanol (2,5 ml pivə və 1 ml şəraba ekvivalent) və ya preparatın 10 ml-də 196,2 q etanol (5 ml pivə və 2 ml şəraba ekvivalent) və bu hal alkoqolizmdən əziyyət çəkən xəstələrə təyin olunduqda nəzərə alınmalıdır.
Preparat durulaşdırılmamış qəbul edilir. Müalicə müddətində spirtli içkilər və turşular (limon turşusu, sirkə və s.) qəbul etmək olmaz – benzokainin yerli təsir effekti zəifləyə bilər.
Digər dərman vasitələrilə qarşılıqlı təsiri
Almagel A ilə eyni vaxtda digər preparatlar təyin olunarsa bu preparatlar Almagel A-dan 1-2 saat əvvəl və ya 1-2 saat sonra qəbul edilməlidir.
Preparat mədə şirəsinin turşuluğunu zəiflədir ki, bu da eyni zamanda qəbul edilən digər dərman vasitələrinin effektivliyinə təsir edə bilər.
Almagel A H2-histamin reseptorlarının blokatorlarının (simetidin, ranitidin, famotidin), üskükotu (digitalis) qlikozidlərinin, dəmir və litium preparatlarının, xinidinin, meksiletinin, fenotiazin preparatlarının, tetrasiklin sırasından olan antibiotiklərin, siprofloksasinin, izoniazidin, ketokonazolun, sulfanilamid preparatlarının müalicəvi təsirini aşağı salır. Almagel A mədə şirəsinin turşuluğunu aşağı salır və buna görə də yuxarıda göstərilən dərman maddələrinin bağırsaqda həll olan tablet formalarının Almagel A ilə birlikdə qəbulu onların örtüklərinin daha tez dağılmasına və mədə və onikibarmaq bağırsağın selikli qişasının qıcıqlanmasına səbəb ola bilər.
Almagel A bəzi laborator və funksional müayinə və testlərin nəticələrinə təsir edə bilər: mədə sekresiyasını azaldır və mədə şirəsinin turşuluğunun funksional müayinəsinin nəticələrini dəyişir; texnesiumun (Tc99) istifadəsilə aparılan testlərin nəticələrini dəyişir (sümüklərin ssintiqrafiyası və qida borusunun müayinəsinin bəzi testləri), zərdab fosforunun miqdarını artırır, qanın zərdabının və sidiyin pH göstəricisini yüksəldir.
Hamiləlik və laktasiya dövründə istifadəsi
Hamiləlik və laktasiya dövründə istifadə etmək olmaz.
Nəqliyyat vasitələrini və digər potensial təhlükəli mexanizmləri idarəetmə qabiliyyətinə təsiri
Preparatın nəqliyyat vasitələrini və digər təhlükəli mexanizmləri idarəetmə qabiliyyətinə mənfi təsiri barədə heç bir məlumat yoxdur.
İstifadə qaydası və dozası
Böyüklərə təyin olunur.
Almagel A gündə 3-4 dəfə 5-10 ml (1-2 ölçü qaşığı) yeməkdən 15 dəqiqə əvvəl qəbul edilir. Maksimal müalicə kursu 6-7 gündür. Sonra müalicə Almagellə davam etdirilir.
Preparatın istifadəsindən sonra 15 dəqiqə ərzində maye qəbul etmək olmaz. İstifadədən əvvəl suspenziyanı çalxalayıb homogenləşdirmək lazımdır.
Preparatın bir qəbulu ötürüldükdə, onu növbəti qəbul vaxtı dozanı artırmadan istifadə etmək lazımdır.
Əlavə təsirləri
- Qəbizlik – doza aşağı salındıqda keçir;
- ürəkbulanma, qusma, mədə spazmları;
- dadbilmə qabiliyyətinin dəyişməsi;
- allergik reaksiyalar;
- böyrək çatışmazlığından əziyyət cəkən və dializ müalicəsində olan xəstələrdə preparatın davamlı qəbulu əhval-ruhiyyənin dəyişməsi və əqli fəaliyyətin pozulmasına səbəb ola bilər;
- preparatın yüksək dozalarda uzunmüddətli qəbulu qidada fosfor çatışmazlığı ilə birgə osteomalyasiyaya (sümüklərin yumşalması) səbəb ola bilər;
- qanda hipermaqneziemiya;
Əlavə təsirlər hər kəsdə və hər zaman aşkarlanmır.
Doza həddinin aşılması
Tövsiyə olunan dozanın birdəfəlik aşılması, adətən, yalnız qəbizlik, meteorizm, ağızda metallik dad, udma prosesi zamanı hissiyatın itməsi (benzokainin təsirindən) ilə özünü biruzə verir.
Preparatdan uzunmüddətli yüksək dozalarda istifadə etdikdə udma aktının pozulması, böyrək daşının əmələ gəlməsi, qəbizliyin ağır forması, qarın nahiyəsində ağrı, yuxululuq, qanda hipermaqneziemiya qeyd edilir. Metabolik alkaloz (orqanizmin turşu-qələvi müvazinətinin pozulması) əlamətləri meydana çıxa bilər – əhval-ruhiyyənin dəyişməsi və əqli fəaliyyətin pozulması, əzələlərdə keyləşmə və ya ağrı, əsəbilik, tez baş verən yorğunluq, tənəffüsün ləngiməsi, ağızda xoşagəlməz dadın olması. Bu halı aradan qaldırmaq üçün dərman maddəsinin orqanizmdən xaricolması sürətləndirilir – qusma törədilir, mədə yuyulur, aktiv kömür təyin edilir.
Buraxılış forması
170 ml-lik şüşə və ya polietilentereftalat flakonda. 1 flakon ölçü qaşığı və içlik vərəqə ilə birlikdə karton qutuya qablaşdırılır.
Saxlanma şəraiti
25C-dən aşağı temperaturda və uşaqların əli çatmayan yerdə saxlamaq lazımdır. Dondurmaq olmaz.
Yararlılıq müddəti
2 il.
Flakon açıldıqdan sonra 3 ay ərzində istifadə edilməlidir. Yararlılıq müddəti bitdikdən sonra istifadə etmək olmaz.
Aptekdən buraxılma şərti
Reseptsiz buraxılır.
İstehsalçı/Qeydiyyat vəsiqəsinin sahibi
Balkanfarma – Troyan AD, Bolqarıstan. 5600 Troyan, Krayreçna küç. № 1.
Tel.: (+ 359) 0670 68 104.
Faks: (+ 359) 0670 62 610.